Bthah ka ïingbishar Meghalaya High Court ban kit ïaki ñiut ba lumthup ha Jowai

Syllad | The Rising MeghalayaApril 12, 2022

Ka ïing bishar Meghalaya High Court haka sngi ba Ar kala bthah iaka JHADC bad Jowai Municipal Board ban kit ïaki ñiut kiba lum thup ha Jowai.

Ka ïingbishar kala pynmih iaka hukum hadien ba kala shongbishar iaka Public Interest Litigation (PIL) No. 6/2022  kaba ai mukotduma da ka Synjuk Ki Waheh Shnong Jowai pyrshah iaka Sorkar Jylla, Commissioner and Secretary ka tnad Urban Affairs ka Sorkar Jylla, Jaintia Hills Autonomous District Council, Jowai Municipal Board bad kiwei.

Kine ki ñiut kiba la lumthup ki kynthup ha iew Iaw Thymme, Ladthadlaboh, Iawmusiang (ha Lad Thomas Jones College, ha khmat DC ophis) bad naduh 4 tarik u bnai Rymphang ym shym la pynkhuid iaki ñiut kiba mih na ki iing ki sem na sor Jowai bad ki iew.

Ki dur ki dar kiba la shon dangshen kiba la suh lang kum ka sabut kilong kiba i saitmet bad na kaliang ka synjuk kala kyrpad ban pynkhuid iaki niut bad ban bret haki jaka ba dei ban bret.

Na kaliang ka sorkar kala ong baka kam ban pyllang ñiut ka dei jong ka JHADC bad ka Municipal.

Ha ka juh ka por ka ïingbishar kala ong baka konsil bad ka Jowai Municipal Board ki dei ban pynthikna ban pynlang pynlum iaki niut bad ban bret ha ki jaka ba dei ban bret katkum ki kyndon jong ka aiñ.

Ia kane ka mukotduma yn shong bishar biang haka 20 tarik u bnai Iaiong 2022.