Bthah ka iingkashari ban pyndep ia ka ‘departmental proceeding’ ia u heh pulit AIG halor ka jingkynnoh bamsap

Syllad | The Rising MeghalayaDecember 3, 2024

Ka iingkashari Meghalaya High Court ka la hukum ba dei ban pyndep noh ia ka jingshim bishar jong ka tnad (Departmental Proceeding) pyrshah ia u Assistant Inspector General (AIG) u Bah GK Iangrai halor ki jingkynnoh kam bamsap hapoh ka 31 tarik u Lber 2025.

Haba pynmih ia kane ka hukum ha ka 2 tarik Nohprah, ka kynhun ki nongbishar kaba kynthup ia u Chief Justice IP Mukerji bad u Justice W Diengdoh ka la ong, “Ka iingkashari ka don ka jingsngew halor ka jingkynnoh ba ki bor ba dei khmih kim shym la shim ia ki sienjam ban leh ei ei ha kaba iadei bad kane ka jingkynnoh leh bakla jong une u heh pulit.

Ka la ong ba ka iingkashari kala tuklar. “Ngi shem ba ka tnad ka la shim ia ki sienjam ba kongsan ha kane ka jingiaid kaba lah palat ar snem kumba kwah da ka iingkashari. Kumta kane ka kam kam donkam shuh ia ka jinghap bishar jong ka iingkashari ha ka jingsngew ka jong ngi. Ngi pynwai noh ia kane ka PIL da kaba hukum ba ia ka jingbishar jong ka tnad dei ban pyndep noh kham kloi, kata la kumno kumno hapoh ka 31 tarik u Lber 2025. Ngi bthah ruh ba ia ki mukotduma halor ki kam bymman dei ban pynbeit noh hapoh jong kane ka por hi.”

U Bah Iangrai u la shah kynnoh donkti ha kaba thied sop sop haduh 29 tylli ki kali na ka bynta ka tnad pulit, bad buh ia kine ki kali ha lade bad pyndonkam bakla ia ki ha ka por ba u dang bat kum u Assistant Inspector General of Police (AIGP).

Ia kane ka hukum la pynmih ruh hadien ba la pyntip sha ka iingkashari da u Advocate General ba napdeng ki 43 ngut ki nongai sakhi ban pyndep ia ka jingtohkit da ka tnad, 41 ngut la dep ban shong bishar katba arngut kiwei pat ym shym la pyndep. Kumta la shim ba ka jingshim bishar ia ki jingai sakhi la pyndep pura.

“La pyntip ruh sha ngi ba ia ka charge-sheet halor kane ka mukotduma kam bymman ruh la dep ban pynkhreh pyrshah ia une u heh ophisar. U la shah kem, u la shah set bad mynta u la ioh jamin. Ngi la shimkhia halor kine ki jingshisha baroh ha ka jingbishar. Kumta ruh ha ka jingkhmih ka jong ngi la pyndep ia ka jingthmu jong ka PIL,” ong ka kynhun ki nongbishar.

“Kino kino ki briew kiba sngew ba ki don ka jingshah ktah ki lah ban leit mudui pyrshah ha kano kano ka iingkashari,” ka la bynrap.