Bthah ka Iingkashari ban tei thymmai ia ka skul St Anthony’s LP ka ban iasyriem kum kaba rim

Syllad | The Rising MeghalayaFebruary 25, 2025

Ka Iingkashari Meghalaya High Court ha ka 24 tarik Rymphang ka la bthah ia ki bor pyniaid jong ka skul St Anthony’s Lower Primary ba ki dei ban pynthikna ba ka plan bad ka jingpynwandur ia ka jingtei kaba thymmai jong ka skul ka dei la kumno kumno ban kham iasyriem bad ka jingtei barim kaba la pynpra.

Ka Iingkashari kaba kynthup ia u Chief Justice IP Mukerji bad u Justice W Diengdoh ha ka hukum ba la pynmih hadien ba la shong bishar ia ka PIL ka la ong, “Da kaba bishar bniah halor kine ki jingshisha baroh ba la kdew, ngi ailad ia ki bor pyniaid skul ba kin tei pat ia ka iingskul, hynrei ka plan bad ka jingpynwandur ia ka jingtei la kumno kumno ka dei ban iasyriem bad ka jingtei kaba la pynpra. Lada dei ban pynkylla ia ka plan ba la mynjur lah ban leh ruh ia ka bad ban ioh ia ka jingmynjur na ka Meghalaya Urban Development Authority.”

Ka Iingkashari ka la bthah ruh ia ki nongshah kynnoh pynkhein hukum ba ki dei ban aiti ia ka affidavit ha kaba iadei bad ki jingkylli jong ka iingkashari hapoh jong ka 17 tarik u Lber.

Mynta, ka jingkylli kaba donkam ia ka jubab ia kong kane: Ka hukum ba la pynmih da ma ngi ka dei kaba la pynmih ha ka 9 tarik Nohprah 2024. Ki bor pyniaid skul ki tip bha ia kane.

Ka Iingkashari watla ka la khang namar ka shuti Christmas, hynrei ka vacation bench ka la bteng ban shong bishar. Balei ia kane ka jingkam halor ka jingma kaba ap ia ka jingtei bad ka jingdonkam ban pynpra noh ia ka ym shym la wanrah sha ka jingtip jong ka vacation bench bad ban pan jingbit na ka bynta ban pynpra ia kane ka iingskul kaba rim?

“Haba ia kane ka mukotduma la buh ban shong bishar ha ka sngi kaba bud hadien ba la plie biang ia ka iingkashari ha ka 28 tarik Kyllalyngkot 2025, balei ha ka por jong ka shuti ka iingbishar la hap ban pynpra ia ka iingskul haba la ailad ba kan ieng baroh shikatta,” ka la ong.

Ki Affidavit ba la ai hakhmat ka ïingbishar ki ong ba ka St. Anthony’s Lower Primary School.

“Ka dei ka skul hikai iaki khynnah hapdeng ki klas nursery bad klas -V. Ka jingbun ki khynnah skul kalong 650. Naduh ka 13 tarik u Kyllalyngkot, 1922, ia kane ka skul la pyniaid da ki mishoneri jong ki Salesian jong u Don Bosco jong ka Balang Katholik. Ia kane ka iing skul la tei hapdeng u snem 1949 bad 1952. Ka la don 72 snem ka rta.

Ha u snem 2024 la lap ba ka jingtei kala tor bad tlot ha kaba la donkam ban shna biang bad ban pynthymmai. Ki bor pynïaid jong ka skul ai trei haka Reliant Foundations Private Limited na Guwahati kaba la leh ïa ki jingtest bapher bapher bad ai jingmut ban pynkylla ha ka rukom shna iaka iing.

Kane ka mat ki la poi sha ki bor ba pyniaid haka u snem 2024 haba la kynnoh ba ka la lap ba ka ïing ka kala tor bad donkam kyrkieh ban ïada na kino kino ki jingjulor bad iada na ka jingma,” kumba la thoh ha ka jingai jingmut jong ki bor pynïaid jong ka skul ha ka 4 tarik u Kyllalyngkot, 2025.

Ha ka Affidavit la kdew ruh ba ka Meghalaya Urban Development Authority ka la mynjur ia ka plan ban pynbeit thymmai, ban shna thymmai bad kumta ter ter khlem da buh jingkylli ei ei ha kaba iadei bad pynneh kum ka jingtei sahnam.

Ka la pynpaw ruh ba la dep pynpra noh ïa ka jingtei. Ki khynnah skul ruh la pynkynriah sha kawei pat ka jaka. Ka dei ka skul ba pawnam ha Shillong. Ia ka plan ban shna thymmai ia ki iing la mynjur da ka tnad pynroi sor ka jylla Meghalaya.

Katkum ka jingong jong ki bor ba dei peit, ha ka jingpeit lang ha square, ia u mot jong u Don Bosco bad ka bynta ba shakhmat ka skul, ia ka jingtei dei ban pynbna kum ka ka heritage ne jingtei sahnam.