Bthah ka iingkashari ia ka CBI ban phah tang ki sakhi ba donkam ha ka jingtohkit jyrsieh tah sia lieh

Syllad | The Rising MeghalayaDecember 10, 2024

Ka Iingkashari Meghalaya High Court ha ka 9 tarik Nohprah ka la bthah ia ka Central Bureau of Investigation (CBI) ba kan phah tang ia ki katto katne ki sakhi kiba donkam ha kaba iadei bad ka jyrsieh tah sia lieh ha kaba thungkam nonghikai ha u snem 2009 ha kaba la kynnoh ia ka jingdonkti jong ka Myntri Sorkar ka Kong Ampareen Lyngdoh.

Ia kane ka hukum la pynmih da ka Single Bench jong ka iingkashari High Court ba la khlieh da u Chief Justice IP Mukerji ha ka jingbishar ia ka mukotduma No. 36, 37, 70 and 71 jong u snem 2023 hapdeng ka Central Bureau of Investigation Shillong pyrshah ia ka M. Ampareen Lyngdoh bad kiwei pat, bad u Jeffrey D. Sangma pyrshah ia ka Central Bureau of Investigation bad kiwei pat.

Ha ka jingbishar, ka iingkashari ka pyntip ba ka Myntri sorkar Jylla ka Kong MA Lyngdoh bad arngut kiwei pat ki la shah kynnoh leh kam beain bad pynkylla ia ka rukom jied bad thungkam ia ki nonghikai Assistang teacher ha ki kyrdan Lower Primary School jong ka Sorkar Meghalaya ha u snem 2008-09.

Ka Kashari ka la ong ruh ba ia ka jingtohkit ia kane ka mukotduma, (PS Case hapoh ki kyndon 120B, 167, 466, 408, 34 IPC) la aiti ha ka Central Bureau of Investigation (CBI) ba kan pynlong ia ka jingtohkit da kane ka iingkashari High Court.

Ka iingkashari ka la ong ba haduh mynta ym palat ia ka 20 ngut ki nongsakhi ia kiba la dep ban sngap ha ka jingbishar, bad la  ioh jingtip ba ki don haduh 162 ngut ki nongai sakhi.

“Ka mukotduma ba la mudui da ki nongshah kynnoh ka long halor ki nongrim bapher bapher. “Ka nongrim ba la pynpaw da ka nongshah mudui ba nyngkong kaba dei ka Myntri sorkar ka Jylla ka long ba ka chargesheet kam shym la pynpaw ia kano kano ka jingdonkti,” ong ka hukum.

Ka iingkashari ka shim ruh ba kane ka jingbishar kam bymman na ka PS Case No.62(07)2011 kala sahteng mynta lah palat 13 snem, bad kumta ka la dei ka por ban pynkut noh ia ka” ong ka Iingkashari ha ka hukum. La buh tarik ban bishar biang ia kane ka mukotduma ha ka 20 tarik u bnai Rymphang 2025.