Bthah ka Iingkashari ia ka Sorkar ban pyndep ka jingjurip ia ki weighbridge

Syllad | The Rising MeghalayaFebruary 14, 2025

Ka Iingkashari Meghalaya High Court ha ka 12 tarik Rymphang ka la bthah ia ki bor sorkar ban pyndep noh ia ka jingjurip ba markhmat ia baroh ki weighbridge kiba don ha ka Jylla hapoh jong ka 30 tarik u Iaiong mynta u snem.

Ia kane ka hukum la pynmih da ka Iingkashari kaba kynthup ia u Chief Justice IP Mukerji bad u Justice W Diengdoh hadien ba la bishar ia ka PIL ba la mudui da u Tennydard M Marak uba la kynnoh ia ka jingbym leh ei ei bad ka jingpyniaid bakla jong ka Sorkar ban pyntreikam ia kine ki weighbridge kaba lam sha ka jingduh ia ka khajna kaba heh ia ka sorkar. Kane ka khajna ka kynthup ia ka bai kit palat pud, ka cess bad ka “royalty” ha kaba iadei bad ki mar ba shalan shabar ri, ka kuna, ka bai wai, ka bai wai bad kiwei kiwei.

“Ka jingjurip ia baroh ki weighbridge ha ka Jylla ka dei ban kut noh haduh ka 30 tarik Iaiong 2025. Ka kaiphod ka dei ruh ban kynthup ryngkat ki jingbthah katkum ka hukum ba ngi la pynmih ha ka 5 tarik Nohprah 2024, kata ia kaba dei ban pyndep hapoh ka 2 tarik Jymmang 2025,” ong ka Iingkashari.

Nalor kata ka la bthah ruh, “Ba dei ban pynkhreh ia ka list jong ki weighbridge bad ban phah lyngba ka sorkar sha u nongmudui hapoh ka 19 tarik Rymphang 2025. Lada u nongmudui u ngeit ba ki don ki weighbridge ki bym shym la kynthup un pyntip ia kane sha ka sorkar.Halor kane yn sa pynbeit khatduh ia ka list. Kumta ruh ia ka list jong ki weighbridge ba la pynkhreh da ka sorkar yn niew kum kaba khatduh.”

“Ia ka jingleit jurip ba markhmat kaba ar kynta dei ban pynlong da ki nongshah mudui ha ka jingiadon lang u nongmudui kata ha ka por ba jur bha ka jingdheng kali lyngba kawei pa kawei ka weighbridge bad ban pynneh ia ka jinglong barieh jong kane ka jingjurip kumba la kdew ha ka hukum jong ngi ha ka 5 tarik Nohprah 2024,” ka la bynrap.

Kham hashwa, kata ha ka 5 tarik Nohprah u snem ba la dep, ka Iingkashari ka la bthah ia ka jingleit jurip da ki ophisar sorkar ban pynthikna ia ka jingshisha jong ki jingpynpaw ha ka dorkhas bad ban pan ia ka kaiphod na u Commissioner of Transport.

“Ngi la iohsngew ia ki jingpynpaw jong ki nongiasaid na baroh ki liang. Ka jingjurip bniah ha ka rukom kaba dei kaba long katkum ka jingbthah kaba ngi, na kino kino ki daw ym shym la pynlong kat haduh kine ki sngi. Kaba nyngkong eh ka don ka jingiapher jingmut hapdeng ki mamla ha kaba iadei bad ka jingdon jong ki weighbridge kiba shah kynthup. Kaba ar u nongiasaid ain na ka bynta u nong ujor u la pynpaw ba u briew (client) jong u um shym la ioh ia ka jingpynbna halor ka jingjurip, kata katkum ka hukum ba la pynmih ha ka 5 tarik Nohprah 2024, ha ka por kaba biang. Kano kano ka jingjurip kaba la lam ba la leh da ka sorkar la leh khlem da pyntip sha u nong ujor,” ong ka hukum.

Ha kajuh ka por u Advocate General u la pynpaw ba ka sorkar ka la mynjur ban pynlong ia ka jingjurip kaba thymmai.