Bthah ka ïingkashari ia ki DM ban pyntreikam ia ka hukum ban shna jaka thang briew hapoh 4 taiew

Syllad | The Rising MeghalayaMarch 5, 2025

Ka Iingkashari Meghalaya High Court ha ka 4 tarik Lber ka la bthah ia ki District Magistrate ba kin pyntreikam ia ka hukum jong ka hapoh ka saw taiew halor ka mat kaba iadei bad ka jingshna ia ki jaka thang briew.

Ha ka hukum kaba la pynmih hadien ka jingshong bishar ia ka PIL, ka Iingkashari kaba kynthup ia u Chief Justice IP Mukerji and Justice W Diengdoh ka la ong, “Ngi la bthah ia ki District Magistrate ban pyntreikam mardor ia ka hukum jong ngi kaba la pynmih ha ka 25 tarik Risaw 2024 hapoh jong ka saw taiew naduh mynta ka sngi.”

Ka Iingkashari ha ka hukum jong ka kaba 25 tarik Risaw 2024, ka la bthah ia u Amicus Curiae bad District Magistrate ban shong jingialang bad ki ar kynhun jaidbynriew (Ki trai shnong Khasi Jaintia bad ki nongialam niam Hindu) bad ban pynkohnguh ia ki ba kin mynjur  ia ka jingtyrwa ban thang ia kiba iap tang ha kawei ka jaka thangbriew bad ha la ki jong ki jong ki por na ka bynta ki dkhot jong kine ki kynhun nongshong shnong, kata lada ka jingdonkam ka dawa.

Ka la kdew ruh,” Ki hok halor ki jingleh niam leh rukom na ka bynta ka jingon thang ia kiba iap ki iapher, hynrei ki rukom pynkhuid ia ki metiap kiba sah ka long kumjuh, kata da kaba thang. Ki trai ri trai muluk kiba dei ki Khasi bad Jaintia ki sngew artatien ban iasam lang ia ka jaka thang bad ki Hindu. Hynrei ka jingeh ka long namar ka jingbym don ki jaka thang kiba biang ha ka jaka kaba heh jong ka Jylla ha kaba ia ki metiap la hap ban kit lyngba ka lynti kaba jngai na ka bynta ban pyndep ia ka jingleit on thang.”

Ha ka hukum kaba la pynmih hashwa, ka iingkashari ka la kdew ruh ba ka sorkar ka la tyrwa ban thaw da ka jaka thang briew ba pyndonkam da ka bording elektrik ha New Shillong, Tura, Jowai bad Nongpoh bad ban mang na ka bynta kine ki project ha Syllei -Iawkein, Nongstoin, Khliehtyrshi, Jowai-West Jaintia Hills bad Jhalupara ha Shillong.

“Hynrei, ym don kawei ruh kaba treikam. Khamtam eh, haduh mynta, tang khyndiat ne ym shym la don satia ka jingiaid shakhmat,” ka la ong.