Bthah ka ïingkashari iaka Sorkar ban shim kongsan ban tep noh ia ki jaka tih dewiong ba la shu iehnoh
Ka ïingkashari Meghalaya High Court ka la bthah ia ka Sorkar Jylla ban shim kum ka mat kaba kongsan halor ka jingdonkam ban tep noh ia baroh ki jaka tih dewiong kiba don ha ka Jylla ia kiba la shu iehnoh.
Ha ka hukum kaba la mynjur ha ka 16 tarik Nohprah, ka kynhun ki nongbishar kaba kynthup ia u Justice HS Thangkhiew bad u Justice W Diengdoh ka la ong, “Ha kaba iadei bad ka jingtep ne khang dam ia ki jaka tih dewiong kiba la shu iehnoh, la iathuh ba ia kane ka kam la aiti sha ka Central Mine Planning & Design Institute Limited (CMPDIL) bad ka jaka ha ka thain Sutnga, East Jaintia Hills District bad ka Agremgittim, South Garo Hills District la ithuh na ka bynta ka jingpyrshang ba rit (Pilot Projects).
La iohi shuh shuh na ka kaiphod ba hadien ba la dep ia ka jingjurip bad bishar bniah, nangta katkum ki jingtip ba la khein na ki jingjurip, ia kane yn aiti sha ka CMPDIL ban pyndep ia ka Detailed Project Report (DPR) na ka bynta ka jingai jingmut ha kaba iadei bad ki jingthew ba kyrpang kiba donkam na ka bynta ka jingtep noh ia kine ki jaka tih dewiong bad kiwei pat ki bynta kiba iadei bad kane ka kam. Hangne ruh na ka bynta ka jingtreikam ba la kdew jong ki artylli ki Pilot Project bad na ka bynta ka por ba la antad ba ki lah ban donkam ym shym la ai jingtip ei ei ruh.
“Namar ba kane ka juh ka dei ka mat kaba sngewkhia shibun, kumta la khmih lynti ba u nongshah mudui na ka Jylla un shim kongsan ia kane ka kam khamtam namar kane ka aiom tlang ha kaba ki kam tih dewiong beain ki lah ban jia bad ki par dewiong ba la iehnoh ki lah ban treikam biang,” ong ka iingbishar.
Ka iingbishar ka la pynpaw ruh ba halor ka jingai jingmut kumba la kdew ha ka 26th interim report ba la aiti da ka Committee u Justice (Retd) BP Katakey la iohi ba ha ka jingjurip lyngba ki drone, ka Sorkar Jylla ka la pyntreikam ia ki jingshakri lyngba ka Meghalaya Basin Development Authority (MBDA) da ka jingmynjur jong ka Committee u Katakey na ka bynta ban pynlong ia ka jingjurip kaba na suin ia dewiong uba don lane lada don shabar jong ki jaka lum thup.
Katkum ka kaiphod la iohi ba ia ka jingpynlut pisa bad ka jingmynjur mynta la ai da ka Oversight Committee bad la thung ia ka M/s Garuda UAV Soft Solutions ban pynlong ia ka jingjurip bad ka jingtrei ba la pynkhamti ha ki na ka bynta ka jaka kaba heh 769.7 sq. kms.
La iohi ruh ba ka jingmynjur ia ka pisa kaba kot haduh T.7.26 klur, hynrei ha ka status report ym shym la pynpaw ia ka por kaba thikna ba lano dei ban pyndep ia kane ka kam, lait noh tang ka jingjurip ba nyngkong ba la kdew ba dei ban pyndep ha kaba kut jong u bnai Kyllalyngkot 2025.
La pynpaw da u Advocate General iaka por kaba thikna donkam ban ioh jingtip na ka agency, bad yn buh ia ki jingtip ha khmat ka Kashari ha ka tarik kaba bud.
Halor ki jingujor halor ka jingshalan beaiñ bad ka jingbud ryntih ia ka SOP ban shalan dewïong uba mih na shabar ka jylla, ka Kashari ka la kdew ba katkum ka report kaba mynta, ka jingujor jong uwei u Krishan ha ka 14.10.2024, la dep pynkut namar ba u nongmudui um shym la wan mih ban pynshisha hakhmat ka committee.
Ka kaiphod jong ka Administrative Inquiry kala pynpaw ruh ba ka tnad Mining and Geology ka la ai jingbit kaba biang ban shalan katkum ka jingdonkam ia u Shri George Marak. La bthah mynta ban kdew iaka jingthew kaba thikna bad ban bud bniah ia ka SOP ha ka ban ym don kano kano ka jingklumar ha ka jingshalan dewïong uba wan na shabar ka jylla, la ong ka Bench.
Ha kajuh ka por, ka iingkashari ka la bthah ruh ia ki bor Sorkar Jylla ban pynthikna halor ka jingbud ryntih bad ia ki jingai jingmut dei ban pynurlong kloi bad ia kane kajuh dei ban pyntip sha ka Committee u Justice Katakey shwa ba ka ka jingplie biang ia ka Kashari.
Facebook
Instagram
Youtube
Twitter
Leave a Reply