Bthah ka Meghalaya HC ia ka Sorkar ban khein beain ia ka jingpyndonkam plastik ha ka Jylla

Syllad | The Rising MeghalayaNovember 22, 2024

Ka Iingkashari Meghalaya High Court ha ka 21 tarik Naiwieng ka la bthah ia ka Sorkar Jylla ba kan khein beain noh ia ka jingshna, jingpyniaid bad ka jingpyndonkam ia ki plastik kiba duna ia ka 120 micron hapoh ka Jylla.

Ha ka hukum kaba ka la pynmih hadien ka jingpynsngew ia ka PIL halor kane ka phang, ka kynhun ki nongbishar kaba kynthup ia u Chief Justice Indra Prasanna Mukherji bad u Justice W Diengdoh ka la ong, “Tad haduh ban da don da kiwei pat ki lad ban bujli ban pyndonkam pura ha ki jaka jong ki plastik ha ki iew ki hat, la bthah ia ka sorkar ba kan bud ia kine ki policy: (i) Ban pynmih ia ka administrative order lane wanrah ia ka ain ban khang noh shisyndon ia ka jingshna jing pynmih bad ka jingpyniaid iew bad pyndonkam ia ki plastik kiba duna ia ka 120-micron ka width. (ii) Ban kurup noh ia ki plastik kiba duna ia ka 120-micron na ki nongshna nongpynmih plastik, ki nongpyniaid iew bad ki nongpyndonkam. (iii) Ban shim ia ki sienjam kiba treikam pura khnang ban lah ban tehlakam ia ka jingbret pathar ia ki plastik hapoh ka por kaba lyngkot bad (iv) Ban leit jurip ia ki jaka paidbah bad ban lum ia kine ki plastik bad ban phah ia ki sha ki waste management.”

Ka PIL ka la kyrpad ia ka iingkashari ban pynmih ia ka hukum na ka bynta ban khang dam syndon ia ka jingpyndonkam plastik hapoh ka Jylla Meghalaya.

“Haba pdiang ia ka wirt petition ha ka 16 tarik u Nailar 2024, kane ka kynhun nongbishar ba la pyniaid da u Chief Justice barim ka la hukum ia ka sorkar Meghalaya ban shim ia ki sienjam na ka bynta ban khang pura ia ki mar plastik hapoh ka Jylla. Ngi pynthikna na ka shithi bad ka katei ka hukum ba haduh ka por ba la lap ia kiwei pat ki mar ki ban mih bujli ha ki jaka jong ki plastik bad ki ban shakri ha kajuh ka rukom kum ki plastik kumba long mynta, ka sorkar ka dei ban shim ia ki sienjam ba pyrkhing bad tehlakam ha kaba iadei bad ka jingpyndonkam ia ki mar plastik,” ong ka kynhun ki nongbishar.

Nalor kata ka la ong ba ka affidavit jong u Secretary in-charge ka Tnad Forest & Environment ha ka 30 tarik u Nailur 2024 ka la pynpaw ia ki sienjam ba la shim da ka Tnad katkum kane ka hukum.

La iohi lyngba kane ka kaipod ba ka sorkar ka la wanrah ia ka policy ha kaba iadei bad kumno ban bret ia ki jaboh plastik bad ruh ia ki sienjam ban kurup ia ki jingbuh tiar ne container ba la shna da ki plastik bad kiwei pat ki mar.

“Haba pdiang ia ka kaiphod jong ka sorkar, ngi don ka jingsngew ba ngi dei ban ai por ia ki ba kin pyntreikam pura ia ka hukum,” bynrap ka kynhun nongbishar.