Bthah ka sorkar ban pyntreikam noh iaki Community Isolation Centre

Syllad | The Rising MeghalayaMay 17, 2021

Ka Sorkar Jylla kala rai ban buh iaki Community Isolation Centre (CIC) haki shnong ki thaw ban kset iaki nongpang kiba iabit khlam COVID kiba hap haka kyrdan A bad B.

Katkum ka shithi u Principal secretary ka tnad ka Koit ka khiah ka Jylla, u Sampath Kumar, IAS kaba la phah sha baroh ki Deputy Commissioner la bthah ban pyntreikam ia ki CIC hadien bala kiew ka jingpang iabit khlam COVID-19 bad iarap kyrshan pisa ia kine ki CIC kiba pdiang iaki nongpang.

Kine ki CIC ki dei ban long kiba kylluid, kiba don jaka sum, painkhana bad ban don ki karma laka jong naka bynta ki shynrang bad kynthei

Ha kine ki CIC, ki ASHA bad ki kynhun kiba iarap kin don ban peit iaka jinglong jingman jong ki briew kiba sah ha kine ki CIC. Iaki nongtrei ka koit ka khiah yn ai jinghikai ban kin ioh ban iarap iaki nongpang COVID-19 kiba donkam ban sumar.

Ha kine ki CIC yn buh kyrpang ruh iaki ambulance shnong ban kit iaki nongpang lada don ki jingdonkam ba kyrkieh.

Ia kine ki CIC yn peit da ka Community COVID-19 Management Teams (CCMTS) bad kan iarap pisa ruh sha ki CIC kiba treikam kiba pdiang iaki nongpang COVID-19.

Kumban shu pynkynmaw ba kine ki Community COVID-19 Management Teams (CCMTs) ki don ka bynta kaba kongsan ban iakhun iaka khlam mynshem snem. Mynta bala sar biang ka khlam ka sorkar kala khot iaka jingiatreilang ki CCMTS.