Bthah ka Sorkar ia ka MSPCB ban leit jurip bad leh audit ia ki karkhana ha Byrnihat

Syllad | The Rising MeghalayaMarch 19, 2025

Ka Sorkar jylla ka la bthah ia ka Meghalaya State Pollution Control Board (MSPCB) ba kan pynlong ia ka jingleit jurip bad ban leh ia ka audit ia baroh ki karkhana kiba don hapoh Byrnihat namar ka jingjur ka jingpynmih ia ka tdem jaboh bad ban aiti ia ka kaiphod halor ki sienjam ba la shim hapoh ka 7 sngi.

Ia kane ka hukum la pynmih da u Commissioner & Secretary ka Tnad Forest & Environment u Pravin Bakshi ha ka 18 tarik Lber hadien ka jingmih khubor halor ka jingjaboh jong ka lyer ba la pynmih da ki karkhana kaba long palat ia ki kyndon ba la buh da ka Central Pollution Control Board (CPCB).

U la ong ba na ka liang u Myntri Rangbah ka Jylla u Conrad K Sangma ruh u la dep ban aijingkren ha ka Dorbar Mang Tynka kaba dang shu dep shen ha kaba iadei bad ki kaiphod bym sngewtynnad na ka ri bad na bar ri ha kaba u la kyntu ruh ia ka jingiatreilang hapdeng ka Assam bad ka Meghalaya halor kane ka jingeh.

Halor kane u la phah ruh da ka shithi sha u Myntri Rangbah ka Assam ban iatreilang namar kiba bun na ki karkhana kiba pynmih ia ka lyer jaboh ki dei kiba don sha ka liang ka Assam.

U la pyntip ba ka Assam Pollution Control Board ka la iaid shakhmat ban shim ia ki sienjam bad pynlong ka jingjurip bad audit ia la ki jong ki karkhana.

Ha kajuh ka por ka sorkar Meghalaya ruh ka la shim ia ki sienjam ba tyngeh ban peitngor bad ban shong bishar ha kaba iadei bad ka jingpynmih tdem jaboh da ki karkhana kiba hap sha ki jaka puta jong ka Meghalaya, u la ong.