Bthah ka Sorkar ia ka Tnat Pulit ban pynneh ia ka suk ka sain ha ki jingialap election ha ka Jylla
U Symbud Myntri Rangbah ka Jylla uba khmih ia ka Tnat kam Pohiing, u Bah Prestone Tynsong u la bthah ia u Director General of Police (DGP) ba un pynthikna na ka bynta ban pynneh ia ka shongsuk shongsain ha ka por ka jingpynlong ia ki jingialap election jong ki party sain pyrthei na ka bynta kane ka Lok Sabha election ka ban long ha ka 19 tarik mynta u bnai.
“Ngi la bthah ia u DGP kumjuh ia ki SP bad DC jong baroh ki district ba ki dei ban long kiba peitngor bad shimkhia namar ki kam ialap ilekshon na ka bynta kane ka Lok Sabha ilekshon ka ban long ha ka 19 tarik mynta u bnai bad ban pynthikna na ka bynta ban pynneh ia ka shongsuk shongsain,” ong u Bah Tynsong haba kren sha ki lad pathai khubor.
![](https://www.syllad.com/wp-content/uploads/2024/09/JIT-Vacancy-823x1024.avif)
U la ong ruh ba la pynmih ia kane ka jingbthah hadien ki jingjia ki bym sngewtynnad kiba la jia dang shen ha kaba ki riew shim kabu ki la pyrshang ban pynthut ia ki jingialang ialap ilekshon jong kiwei pat ki party sain pyrthei kiba iakhun ha kane ka election Lok Sabha ka ban wan.
“Kumta ruh ngi la pynmih da ka jingbthah kaba tyngeh ia u DGP bad baroh ki bor pyniaid district ba kin shimkhia halor kane ka bynta bad ban khmih bniah halor ka jinglong jingman jong kawei pa kawei ka jingialap election. Kane ka long ban pynthikna ban lah ban pynlong ia ka ilekshon kaba iaid beit iaid ryntih,” ong u Myntri kam pohiing.
“Nga kyrmen skhem ba ki jingialang ialap election kin long hapdeng ka jingiaid beit iaid ryntih bad khlem kino kino ki jingjia,” u la bynta shuh shuh.
Leave a Reply