Bthah ka Sorkar ia ki Dorbar Shnong bad Rangbah Shnong ban ym khang ia ki Public Meeting ban ialap elekshon

Syllad | The Rising MeghalayaJanuary 31, 2025

Ka Sorkar Jylla lyngba ka Tnad District Council Affairs ka Jylla ka la bthah ia ki District Election Officers jong ki hynniew tylli ki District ha Rilum Khasi Jainia ban bthah ia ki Dorbar Shnong/Rangbah Shnong ban shah ban pynlong ia ki jingialang paidbah (Public Meeting) jong ki seng sain pyrthei ha kane ka elekshon MDC sha ka KHADC bad JHADC ka ban long ha ka 21 tarik u Rymphang.

Ka shithi kaba la wan lyngba ka Deputy Secretary ka Tnad District Council Affairs ka Jylla, Kong M Shira Kshir ha ka 30 tarik Kyllalyngkot hadien ka jingujor ba dang shen jong ka seng Voice of the People Party (VPP) lyngba u General Secretary uba dei ruh u MP ka Shillong u Dr Ricky AJ Syngkon pyrshah ia ki katto katne ki Dorbar Shnong bad Rangbah Shnong ki bym shym la ai jingbit ia ka VPP ba kan pynlong ia ki jingialang paidbah na ka bynta ban ialap elekshon.

Katkum katei katei shithi, ka Deputy Secretary ka la ong ba baroh ki Dorbar Shnong, Rangbah Shnong ki dei ban shah ia baroh ki seng sain pyrthei kynthup ki kyrtong shimet ba kin pynlong ia ki jingialang paidbah.