Bthah ka sorkar ia u CE ban pynshisha halor ki jingkynnoh bamsap iaka jingshna surok Dawki Amlarem Jowai

Syllad | The Rising MeghalayaNovember 14, 2023

U Symbud Myntri Rangbah ka jylla uba khmih ia ka Tnat PWD (Roads), u Bah Prestone Tynsong haka sngi ba Ar u la pyntip ba u la bthah ia u Chief Engineer National Highways ba un ai ka jingpynshisha halor ki jingkynnoh ha kaba iadei bad ka jingpyntrei torti ia ka projek shna surok Dawki-Amlarem-Jowai da ka Dhar construction company.

Haba kren sha ki lad pathai khubor u Bah Tynsong u la ong; “Nga la bthah ia u CE ka National Highways ban pynlong ka jingtohkit la kane ka jingkynnoh ka long kaba shisha ne kumno bad ngin sa peit ia kaba kum kata ka jingpyntrei torti ha kaba pyntrei ia ki projek kam pynroi, kata la ka long ha ka liang ki lynti surok ne kino kino ki projek ha ka jylla Meghalaya namar kum kine ki jingjia kim dei ban jia.”

Nalor kata u la ong ruh ba ha ka jingshisha ia kane ka bynta jong ka projek shna surok la khmih da u RO Station na Guwahati, kata kaba dei na ka bynta ka surok National Highway Authority of India (NHAI).

Lah ban kdew ba ha ka 4 tarik une u bnai Naiwieng, ka Joint Action Committee (JAC) kaba kynthup ia ki khlieh nongsynshar shnong ka War Jaintia bad ka Seng Hynniewtrep Youth Council (HYC) ki la byrthen ban ujor da ka mukotduma hapoh ka iingbishar Meghalaya High Court halor ka jingkynnoh bam sap pyrshah ia ka Dhar Company ha kaba iadei bad ka jingpyntrei ia ka surok Dawki-Amlarem-Jowai (NH 40E) (New NH 206) kaba la bei tyngka da ka Sorkar Pdeng kaba long haduh T. 43 klur.

Shuh shuh u Bah Prestone Tynsong u la ong; “La ka donkam ne em ban pyndam shisyndon ban trei kontrak ne blacklisting, ia kata yn sa bishar ynda la iaid ka kam. Mar ia sdang ka kam, Ngan sa tip shai halor ka kaiphot kaba ngan sa ioh pdiang, kata kumba nga ong kane ka iadei beit bad ka NHAI namar kane ka dei ka National Highway bad kam shym hap satia hapoh ka jingkhmih ka sorkar jylla. Dei ka NHAI kaba don ia ka bor kaba pura ha kaba iadei bad kane ka projek.”