Bthah ka Sorkar Pdeng ban pynphai ia ka T.200 klur lada ym lah pynbeit ka Jylla ia ka kam jaka na ka bynta ka lynti rel

Syllad | The Rising MeghalayaJanuary 23, 2025

Ka Sorkar Pdeng ka la bthah ia ka sorkar Jylla ba kan pynphai noh ia ka pisa kaba kot palat T.200 klur lada kam lah ban pynbeit noh kham kloi ia ka mat kaba iadei bad ka kam thied jaka na ka bynta ban pyntreikam ia ka project lynti rel ha Rilum Khasi.

Haba pyntip ia kane ha ka 23 tarik Kyllalyngkot, u Myntri Rangbah ka Jylla u Conrad K Sangma u la ong, “Nga la iakynduh ia u Myntri ka tnad Railway uba la pynpaw ka jingsngewkhia halor ka project lynti rel ha Byrnihat bad kumjuh ha Shillong. Nga la dep ban pynpaw shai ha u ha ka jingialang ba ngi donkam ban shim lang ia ka jingmynjur jong ki kynhun bapher bapher bad ba khlem da leh ia kane kam long kaba iahap ia ngi ban leh da ka bor halor kane ka kam. Nga la ban jur ban shim lang ia ka jingmynjur jong baroh shwa ban shim ia ka rai kaba heh kum kane.”

Lah ban kdew ba ka Sorkar Pdeng ka l tyrwa ia ki artylli ki project lynti rel ha ka Jylla, kata ka Tetelia-Byrnihat kaba 22 km bad ka Byrnihat-Shillong kaba 108 km.

Ia ka Tetelia-Byrnihat project la mang ban pyntrei ha ka jinglut ka ban kot T.496 klur. Hynrei, kine ki project ki la iatyngkhuh ia ki jingeh namar ka jingpyrshah na ki kynhun bapher bapher kiba la pynpaw ia ka jingsngewkhia ia ka jingwan rung kyrthep jong ki briew kiba na bar ka jylla.

Na ka liang u Conrad u ong ruh, “U Myntri u la kdew ba un sa thoh shen da ka shithi sha nga ba lada ym lah ban pynbeit noh ia kane ka kam hapoh ka 3 ne 6 bnai, ka pisa T.200 klur kaba la ai ban thied jaka bad kaba la don bad u DC naduh u snem 2017, ngin hap ban pynphai noh. Ngin hap ban pynphai noh bad kaba kham kongsan ka long ba ia kane ka project yn sa pynduh noh bad ka sorkar ka lah ban pyntrei noh ia kiwei ki project lada kiwei pat ki jylla jong ka thain ki don ia ka jingangnud.” 

“Nga la kyrpad ia u (Myntri) ban ai katto katne ka por ba ngin iakren hynrei ka jingai por ka long kaba khim shibun. Um shym la kren thikna ia ki bnai hynrei u la ong ba tang ha ki khyndiat bnai bad un sa thoh shen sha nga da ka shithi bad lada donkam, ma u hi da lade un wan ban shong jingialang bad ki kynhun bapher bapher ban iakren ia halor ka jingkongsan jong kane ka kam bad ngin sa ia peit kumno ka kam kan iaid,” u la ong.