Bthah u ADC Mairang Civil Sub-Division iaki nongshong dukan ban bud pyrkhing iaki adong adit COVID-19
Na ka daw jong ka jinglong jingman ha ka Ri bad ka Jylla na kadaw jong ka khlam COVID-19, u Additional Deputy Commissioner i/c ka Mairang Civil Sub-Division, Mairang, u Bah A. Nongbri, u la thoh biang mynta ka sngi sha ki nongshong dukan ka thain Mairang Sub-Division ban kyntu iaki baroh ba kin bud pyrkhing iaki jingbthah jong ka Sorkar ha kaba iadei bad ki lad ki lynti ban iada na ka jingsaphriang jong u khniang jingpang COVID-19 khamtam ha kane ka wat kaba ar (second wave) jong kane ka khlam ha kaba la sakhi ia ka jingjulor kaba shyrkhei lyngba ka jingbun ki nongpang bad kumjuh kiba la duh noh iala ka jingim na ka daw jong kane ka khlam.
Ula kyntu biang ia baroh ki nongshongdukan ba kidei ban mih shakhmat ban leit shim iaka Tika kum shibynta ban iada na u khniang jingpang COVID-19 namar ba baroh ki nongshongdukan ki don ka bynta kaba khraw ban iada ialade, ia ki nongthied nongpet bad ia ki paidbah salonsar na kane ka khlam.
La bthah ruh ia ki trai dukan ba kin deng beit thik ia ki mask, ban pynbiang ia ki hand sanitizer hakhmat dukan, ban pynkhuid ia ki dukan bad ki rud ki kiar jongki man ka por bad kim dei ban shah ia ki nongthied jingthied bym deng mask ban rung ha ki dukan jongki. Kim dei ruh ban bret pathar iaki niut ki nier bad haba synriah ne jyrhoh ki dei ban da iala ka shyntur bad ka khmut da ka jain rumal lane da ka tymbuit haba ym don jain rumal ha kti. Kim dei ruh ban shah ban iarung khapngiah briew hapoh ki dukan jongki.
Ha kaba iadei bad ki dukan sha bad dukan bam pat, la bthah iaki ba kin buh kham duna ki shuki ne ki ben shong na kaba ju long khnang ban lah ban pyniajngai ia uwei u nongbam na uwei pat. Ki trai dukan kim dei ban shah iaki nongbam ban shongkai hapoh dukan bad ki nongbam ruh, mar iadep bam ki dei ban mih noh napoh dukan. Shuhshuh, ki trai dukan sha bad ja kidei ban pynbiang ia ka jaka thet bad ban buh hand sanitizer hakhmat dukan, ki dei ban pyndonkam ia ki sla bad pela kot ban ai ja ne sha ia ki nongbam bad kim dei ban pyndonkam ia ki pliang ne pela plastic.
La mana ruh ia ka jingbiah pathar bad jingdih duma ne sikret ha ki dukan bad ia ki dukan jong kito kiba pynkhein ne ki bym bud ryntih ia katei ka jingbthah yn hap ban phah khang noh, bynrap shuh shuh u Additional Deputy Commissioner.
Facebook
Instagram
Youtube
Twitter
Leave a Reply