Bthah u DC WJH iaka shnong Khanduli bad Lapangap ban pynbiang iaki kot ki sla halor ka kynnoh kyntur pud ka Assam

Syllad | The Rising MeghalayaJuly 2, 2021

U Deputy Commissioner ka West Jaintia Hills haka sngi Palei ula bthah ïaki ar shnong ka Khanduli bad Lapangap ban pynbiang ïaki kot ki sla jong ki jaka puta halor ka kynnoh kyntur pud bad thmu shna University bad surok ka sorkar Assam ha khappud West Karbi Anglong, Assam bad West Jaintia Hills Meghalaya.

U DC ula bthah ia ki nongialam shnong ka Khanduli bad Lapangap ban pynbiang iaki kot ki sla ban suk ka jingiakren hapdeng ki ar DC jong ki ar district ha ka taiew ban wan halor ka kam pud kam sam.

Kine ki ar shnong kila ai dorkhat ha DC halor ka jingpyrshah iaka jingthmu jong ka Assam ban shna surok bad university haka jaka kaba heh 5000 acres ha khappud bad la kam ba kane ka jaka ka hap ha u pud u sam kine ki ar shnong.

Ka sorkar Assam bad u MLA ka thain Boithalangso LAC, Rupsing Teron haka 30 tarik u Jymmang bad haka 22 tarik u bnai bala dep ha ryngkat ki myntri sorkar bad ki dkhot ka KAAS kila hiar jurip iaka jaka bad kynnoh ruh ba ki nongshong shnong ha khappud kila pynpra iaki mawpud.

“Kane ka jingleh jong ka sorkar Assam khlem pep kan wanrah ka jingïakynad, ïa khajia bad ka jingsngew pher jaidbynriew nalor ka jingsyier haka leit ka wan ki nongshong shnong”, la ong u Pyrkhat Pyrphet uba long u Chairman ka Lapangap Khanduli Border Area Joint Action Committee.

Ki nongialam shnong bad kane ka committee kila banjur ia DC ban tuklar khnang ban iada iaki jaka puta ki shnong khappud bad ban iada ia u pud u sam ka Jylla.

Ha kane ka jingiakynduh ia u DC la donlang ki waheh shnong ka Khanduli bad Lapangap nalor ki dkhot shnong bad ki riewrangbah.