Bthei ki ktang suloi ha Nongpoh, iakhun ki Pulit bad ki runar iohkem 4 ngut

Syllad | The Rising MeghalayaJune 18, 2024

Ha ka jingjia bym shem poi pyrkhat, ki riew runar kiba na Assam kiba thmu ban lute bad rahbor ia u nongniah trok kala pulom noh hadien ba iakhun bad ki Pulit Nongpoh, kiba la hap siat iaka kali jong kine ki runar haka por ba ki thmu ban phet krad.

Kane ka jingjia kala jia haka nohphai sngi jong ka 18 tarik Jylliew haka bynta jong ka Umsning Bypass (Umtrew) haduh Nongpoh.

U Bynraplang Jyrwa MPS, Additional Superintendent of Police, Ri Bhoi District ula ong ba kane ka jingjia kala jia haka por 4:30 baje eiei janmiet, ki pulit kiba don ha Saiden ki la ioh ia ka jingtip na ki nongniah trok kit mar kiba iaid ba ieng ha u surok bah National Highway 06, Ri Bhoi District ba ka don ka Scorpio rong lieh kaba thmu ban lute iaki trok.

Ula ong ba mar mar la pyntip iaki pulit ha Umsning bad Umiam bad ha Nongpoh ruh la buh iaka Naka, hynrei kine ki runar haba poi ha Nongpoh ki thmu ban tynrah beit iaki Pulit bad ma ki ruh kila hap ban pyndonkam da ka bor ban iohkem iaki.

La iathuh haba poi ha Nongpoh kane ka kali Scorpio kaba pynher sted da ka jingthmu ban pyni bor pyrshah iaki Pulit, kumta ki pulit kila siat ha ki bynta ba shakhmat kane ka kali. Ha kum kane ka por kine ki runar kila hiar na ka kali bad phet krad sha khlaw, hynrei na kaliang ka ki Pulit Nongpoh kiba beh thong iaki kila ioh kem iaki.

Kine ki saw ngut kiba shah kem, ki dei u Pradip Gogoi na Dibrugarh, Assam, u Tulan Phukan na Lakhimpur Assam, u Praujal Gogoi na Tinsukia Assam bad u Deep Das u nongniah ka Scorpio na Bubaghat Assam.

Ki pulit Umiam kila ioh ruh ban pyllait im ia u nongniah trok, u Preenchand Kumar Mali na ka shnong Jharkhand. Ka trok number jong u kaba la iehnoh ka dei kaba don ia u number JH 02 AK 9061.

Halor kane ka jingjia ka jingtohkit ki pulit kala iaid shakhmat.