Bud iaki adong adit ka khlam #COVID_19 ong ki Pulit WJH ia u paidbah ha Jowai

Syllad | The Rising MeghalayaApril 30, 2021

Shuwa ban pyntreikam iaka kyndon pynjari (Containment Measures) ka ban sdang naduh 1 tarik Jymmang haduh 10 tarik une u bnai ha sor Jowai, ka tnad Pulit jong ka West Jaintia Hills District kala mih paidbah da ki kali ban iaid rally ban wer bad kyntu ia u paidbah nongshong shnong ban iatrelang ban jop iaka jingsar ka khlam COVID-19.

Ki Pulit jong ka West Jaintia Hills haka jingialam ka Deputy Superintendent of Police (Crime) Kong Cresency W Lyngdoh MPS bad kiwei kiwei ki ophisar ryngkat ka kynhun pulit kila mih sha surok bad iaid kylleng ka sor Jowai ha ryngkat ki tynghung ban kyntu iaki paidbah iatreilang bad ban bud ryngkhi iaki adong adit bala pynbna ka sorkar ban iakhun iaka khlam COVID-19.

“Ki pulit ki long tang ki nongiarap ban tem iaka jingpur iaka jingpur ka khlam bad lada phi (paidbah) phim iatreilang ngim lah ban jop iaka jingsar ne jingwan lyngshop ka khlam. Na kaliang jong ngi ki Pulit ngi kyntu ia baroh naduh ki paidbah, ki nongkhaii, ki nongniah kali bad kiwei kiwei ban bud ryntih iaki adong adit bala buh ryntih ka sorkar ban iakhun pyrshah bad ban pyndkut ia u kynjri jingpur ka khlam,” la ong ka kong Lyngdoh.

“Lada phi ki paidbah phi leh pyrshah, ngim banse ban pyntreikam ia ka bor jong ka aiñ., hynrei ka jingpyndonkam iaka ain ha kum kane ka por kan nym rah jingmyntoi namar ba tang ka jingiatreilang bad bud iaki kyndon ban iada kaba ngi lah ban pyndkut ia u kynrji jingpur ka khlam,” ong ka kong Lyngdoh haba kren lyngba ka tynghung ha iew bad ha ki kyntoit bapher jong ka Jowai.