Budget 2024-25: Ka thaw lad iaka iohkam iohjam bad kyntiew ia ka sap treikam ki nongshong shnong
Ka Myntri ka Pla Tyngka ka Sorkar Pdeng ka Nirmala Sitharaman, ha ka por ba ka pynbna ia ka Mang tyngka jong ka Ri ne Union Budget 2024-25 ha Parliament ha ka 23 tarik Naitung ka la ong ka jingkiew dor ha India ka dang iaineh bad shngain, bad ka dang iaid sha ka thong 4 percent. Ka Core inflation ne ka jingkiew dor ba kongsan (ym dei ki jingbam, ym dei ka umphniang ne fuel) mynta ka long 3.1 per cent bad la shim iaki sienjam ban pynthikna ba ki mar kiba pyut kin poi sha ki iew ki hat haka rukom kiba biang.
Ka Myntri kala ong kane ka mang tyngka kala buh thong ban thaw lad iaki lad iohkam iohjam bad ban kyntiew iaka sap treikam jong ki nongshong shnong, kata ban pynleit jingmut ha ki halor saw kynhun ki nongshong shnong, kiba long ‘Garib’ (Kiba duk), ‘Mahilayen’ (Ki Longkmie), ‘Yuva’ (Ki Samla) bad ‘Annadata’ (Ki Nongrep).
![](https://www.syllad.com/wp-content/uploads/2024/09/JIT-Vacancy-823x1024.avif)
Ha kaba phai sha ki mat ka Budget, ka Sitharaman kala ong ba haba phai sha ka shi snem bad palat, ha kane ka Budget, ngi phai sha ka lad iohkam, ka sap treikam (skilling), ka MSMEs, bad ki middle class ne kiba kham ioh kham biang. Ka Myntri kala pynbna iaka skim jong u Prime Minister’s kaba kynthup iaki san tylli skim bad ki jingpyniaid ban pynsuk iaka lad iohkam iohjam, ka sap treikam bad kiwei pat ki jingmyntoi na ka bynta ki 4.1 klur ki samla haka 5 snem bad ka da ka jinglut na ka sorkar pdeng kaba T.2 lakh klur. Kane ka snem, T.1.48 lakh klur yn mang na ka bynta ka pule puthi, iohkam bad ka jinghikai.
Ki mat ka Budget:
Ka Myntri Pla tyngka ka la ong, ban pynurlong ia ka ‘Viksit Bharat’, ka budget ka pynkhreh ban iai trei shitom halor kine ki 9 tylli ki mat ban pynmih shibun ki lad jingmyntoi ia baroh:
- Productivity and resilience in Agriculture
- Employment & Skilling
- Inclusive Human Resource Development and Social Justice
- Manufacturing & Services
- Urban Development
- Energy Security:
- Infrastructure
- Innovation, Research & Development
- Next Generation Reforms
Ka jinglah ban pynmih bad ka jingkhlain ha ka rep ka riang: Ka jinglah ban pynmih bad ka jingkhlain ha ka rep ka riang ka Myntri Pla Tyngka ka la pynbna ba ka sorkar kan shim ia ka jingwad bniah kaba bniah halor ka rep ka riang ban pynkhlain ia ka jinglah ban pynmih. Ki 109 tylli ki jait jingthung kiba long kiba lah ban pynmih shibun bad kiba lah ban ieng pyrshah ia ka jingkylla ka mariang na ki 32 tylli ki jingthung ha ki lyngkha bad ki jingthung ba pynitynnad yn pynlait sha ki nongrep ban rep.
Ha ki ar snem ban wan, 1 klur ki nongrep ha ka ri kin sa sdang ia ka rep tynrai bad yn kyrshan da kaba ai iaki certificate bad branding. Yn seng ruh iaki 10,000 tylli ki jaka pynmih Ban pynurlong iaka jinglah ban pynmih ia ki symbai (pulses) bad ki umphniang, ka sorkar kan pynkhlain ia ka jingpynmih, ka jingpynlang bad ka jingpyniaid ia ki mar bad ban pynurlong ia ka ‘atmanirbharta’ ia ki umphniang kum ka mustard, ka groundnut, ka sesame, ka soybean, bad ka sunflower. Ka sorkar, ha ka jingïatreilang bad ki jylla, kan pynsuk ia ka jingpyntreikam ia ka Digital Public Infrastructure (DPI) ha ka rep ka riang ban kynthup ia ki nongrep bad ki jaka rep jong ki ha ki 3 snem. Ka Sitharaman ka la pynbna ia ka jingpyniaid kaba long T.1.52 lakh klur ia ka rep bad kiwei ki bynta ha une u snem.
Ka Kamai Kajih bad Ka Jinghikai: Ka Myntri ka la ong ba ka sorkar kan pyntreikam 3 tylli ki skhim ia ka ‘Employment Linked Incentive’, kum ka bynta jong ka skhim jong u Myntri Rangbah. Kine kin long halor ka jingpynrung ha ka EPFO, bad kin kynthup ia ka jingithuh ia ki nongtrei ba dang sdang, bad ka jingkyrshan ia ki nongtrei bad ki nongpyniaid.
Ka sorkar kan pynshlur ruh ia ka jingshiimbynta bun ki kynthei ban seng ia ki jaka sah ia ki kynthei ba trei ha ka jingïatreilang bad ki karkhana, bad seng ia ki jaka ri khynnah (creches).
Haba kren halor ka skhim jinghikai, ka Myntri ka la pynbna ia ka skhim thymmai kaba kyrshan da ka sorkar pdeng, kum ka skhim kaba saw hapoh ka skhim jong u Myntri Rangbah, ban hikai ha ka jingïatreilang bad ki sorkar jylla bad ki karkhana. 20 lak ki samla kin shah hikai ha ka por 5 snem bad 1,000 tylli ki Industrial Training Institutes yn kylla sha ki hub and spoke ne ki shlem ban pyntbit shuh shuh. Ka la pynbna ruh ba ka Model Skill Loan Scheme kan sa pynbha ban pynsuk ia ki ram haduh T.7.5 lakh bad ka jingkyrshan na ka Fund ba la pynmih da ka sorkar, kaba la thew ban iarap ia 25,000 ngut ki khynnah pule man la u snem. Ban iarap ia ki samla, kiba ym pat ioh jingmyntoi na kino kino ki skhim bad ki aiñ jong ka sorkar, ka la pynbna ia ka jingkyrshan pisa ia ki ram haduh T.10 lakh ia ka jingpule ba kham shalor ha ki skul ha ri. Ki e-vouchers na kane ka bynta kin sa ai beit sha 1 lakh ngut ki khynnah pule man la u snem ia ka jingkyrshan dor kaba long 3 percent jong ka jingdon ram.
Ka jingpynroi iaki nongtrei bad ka hok longbriew manbriew: Haba kren halor ka jingpyntreikam iaki skim, ka Myntri ka la pynpaw ba ka jingpyntreikam ia ki skhim kiba thew ban kyrshan ia ki kamai kajih jong ki nongpynmih mar, kata ki nongthain nongthaw, nongshna, ki kynhun SHGs, ki Scheduled Caste, ki Scheduled Tribe bad ki kynthei ba trei kam, bad ki nongdie madan, kum ka PM Vishwakarma, PM SVANidhi, National Livelihood Missions, bad Stand-Up India.
Kine ki kynthup iaka Purvodaya: ban pynroi ia ka thain shatei mihngi jong ka ri kaba kynthup ia Bihar, Jharkhand, West Bengal, Odisha bad Andhra Pradesh. Pradhan Mantri Janjatiya Unnat Gram Abhiyan: ban pynbha ia ka jinglong jingman ka ioh ka kot jong ki jaitbynriew rit paid,
Palat 100 tylli ki shnat jong ka India Post Payment Bank yn seng ha ka thain shatei mihngi ban pynkhlain ia ki kam bank. Ka la ong, ka jingpyniaid kaba long T.2.66 lakh klur ia ka jingpynroi nongkyndong kynthup ia ka jingtei ha nongkyndong la leh ha une u snem.
Ka jingpynmih bad ki kamai kajih: Kane ka budget kala phai khmat kyrpang sha ki MSMEs khamtam ia ka jingpynmih kaba donkam shibun ki nongtrei. Ka jingpynmih ia ka self-financing guarantee fund kan ai jingkyrshan ia man la u nongaplai ban ioh jingkyrshan haduh T.100 klur, lane ka ram kaba kham heh. Kumjuh ruh, ki bank sorkar kin bishar ia ki MSMEs ban ioh iaka ram, khlem da shaniah ha ka jingbishar na shabar. Ka la pynbna ruh ia ka jingthmu thymmai kan pynsuk bank ban ai ram iaki MSMEs ha ka por ba ki don ha ka jingeh.
Iaka Mudra Loan ruh ka sorkar kan sa kyntiew sha T.20 lakh na ka T.10 lakh kaba mynta ia kito ki nongpyniaid ba la dep siew bha ia ki ram ba la dep hapoh ka ‘Tarun’ category.
Ki Unit MSME ban pynmih jingthung, ka jingtest iaka jingbha bad ka jingtest iaka jingshngain yn kyrshan iaki 50 tylli ki multi-product food irradiation units ha ka bynta MSME. Yn seng iaki 100 tylli ki lab ban test jingbha bad jingbha da kaba pynioh ruh iaka NABL accreditation. Ban pynsuk ia ki MSMEs bad ki nongpynmih mar ban die ia ki mar jong ki ha ki iew shabar ri, ki E-Commerce Export Hubs yn seng haka rukom public-private-partnership (PPP).
Ka jinghikai haki kompeni: Kane ka skhim kaba san hapoh ka skhim jong u Myntri Rangbah, kan plie lad ban ioh jinghikai ha ki 500 tylli ki kompeni ba khlain ia 1 klur ki samla hapoh 5 snem.
Ka Jingpynroi Sor: Jingtei Ïing haka PM Awas Yojana Urban 2.0, ki jingdonkam ïing jong 1 klur ki longïing kiba duk bad ki middle class yn pynbiang haka jinglut T.10 lakh klur. Kane kan kynthup ïa ka jingkyrshan na ka sorkar pdeng kaba long T.2.2 lakh klur ha ki san snem ban wan.
Ka Jingai um bad ka jingpynkhuid: Ha ka jingïatreilang bad ki Sorkar Jylla bad ki Multilateral Development Banks, ka sorkar kan pynkiew ïa ki projek ban ai um, ka jingpynkhuid um bad ka jingpynkhuid ïa ki niut ki nar ha ki 100 tylli ki sor ba heh.
ka Myntri kala bynrap ba halor ka jingjop jong ka PM SVANidhi Scheme ban pynkylla iaka jingim jong ki nongdie madan, ka Sorkar ka buh th ong ban kyrshan man la u snem, ha ki san snem ban wan ban pynroi iaki 100 tylli ki ‘haats’ ne ki jaka die jingbam ha ki sor ba la jied.
Katkum ka jingpynbna ha ka interim budget, ka PM Surya Ghar Muft Bijli Yojana kaba la pyllait paidbah ban pynbiang bording ei da ka solar haduh 300 unit man la u bnai ïa 1 klur ki longïing. Ia kane ka skhim la pdiang da ki palat 1.28 klur bad kila pynrung kyrteng bad 14 lak ki dang aplai. Ka bor ding nuclear ka long kaba kongsan na ka jingpynmih bor ding haka Viksit Bharat.
Ka Sorkar Pdeng kan pynkhlain ruh ha ki kam tei jingtei ha ki san snem ban wan, ha ka jingïadei bad ki kam pynroi ba kongsan. T.11,11,111 klur ïa ka jinglut capital expenditure la pynïaid ha une u snem, kaba long 3.4 percent jong ka GDP jong ka ri.
Pradhan Mantri Gram Sadak Yojana (PMGSY), la pynbna ba ka Phase IV jong ka PMGSY kan sa sdang ban pyniasoh ïaki 25,000 tylli ki shnong nongkyndong kiba la biang ha ka jingïadei bad ka jingkiew ka jingbun briew jong ki.
Ban pynïarap ïa ka jingpynmih um bad ka jingpynkhuid um ha Bihar, lyngba ka Accelerated Irrigation Benefit Programme bad kiwei ki tyllong, ka sorkar kan ai jingkyrshan pisa ïa ki projek kaba ka jinglut ka long T.11,500 klur kum ka Kosi-Mechi intra-state link bad 20 tylli kiwei ki skhim kiba dang ïaid bad thymmai kynthup ïa ki barrages, ka jingpynkhuid ïa ka jingjaboh ka um bad ki projek pynpoi um sha ki jaka rep. Ka Sorkar kan ai jingkyrshan ruh ïa Assam, Himachal Pradesh, Uttarakhand bad Sikkim ïa ka jingpynïaid um, ka jingpynkhuid um bad ki projek ba ïadei bad ka jingshlei um.
Ka Jingwad Bniah & Ka Jingpynroi: Ka sorkar kan pynïaid ïa ka Anusandhan National Research Fund ban wad bniah bad tei ïa ki prototype bad tei ïa ka rukom ban pynkiew ïa ka jingwad bniah da ki private sector ha ka jingpynïaid pisa bad la mang T.1 lakh klur
Ka ioh ka kot haka Space ne suibneng: Ka sorkar kan pynleit jingmut ban pynlut 5 shah haka space economy ne ki kam ha suibneng ha ki 10 snem ban wan, ka venture capital fund kaba long T. 1,000 klur.
Ka Myntri kala ong ba ka sorkar kan thaw ïa kan thaw ki lad ki lynti ban pynroi ïa ka ioh ka kot bad ban pynbiang iaki lad ai jingshakri ba har rukom kynthup iaki lad iohkam bad ka sap trei. Yn pynïasoh ïa ka e-shram portal bad kiwei ki portal ban pynsuk ïa ka jingai jingiarap ha kawei ka jaka. Ki Shram Suvidha bad Samadhan portal yn sa pynbha ban pynsuk ïa ka jingtreikam jong ki karkhana bad ki dukan.
Ka Sorkar kan pynbha ruh iaka Taxonomy na ka bynta ka Climate Finance ban pynsuk ïa ka jingdonkam pisa na ka bynta ka jingkylla ka mariang.
Ka jingpynsuk ïa ka Foreign Direct Investment bad Overseas Investment.
NPS Vatsalya: ka NPS-Vatsalya, ka jingthmu ban ai jingiarap da ki kmie ki kpa bad ki nongsumar ïa ki khynnah kan sdang. Ha ka por ba ki khynnah kila dap biang ka rta, yn lah ban pynkylla iaka ka NPS account.
Ka New Pension Scheme (NPS), ka Committee ban peit ïa ka NPS ka la leh bha ha ka kamram jong ka ban pynbeit ïa ki jingeh ban pynsuk ïa ki paidbah.
Ka Budget Estimates 2024-25: ka Myntri pla tyngka kala pyntip ba na ka bynta u snem 2024-25, ka jingioh kaba khlem kynthup ïa ka jingshim ram bad ka jinglut baroh kawei ka long T.. 32.07 lakh klur bad T.48.21 lakh klur. Ka jingioh na ki khajna ka long T.25.83 lakh klur bad ka jingduna pisa ka long 4.9 percent jong ka GDP. Ka Myntri kala ong, ka jingpynïaid pisa lyngba ki securities ha u snem 2024-25 ka long T.14.01 lakh klur bad T.11.63 lakh klur . Ka Sitharaman ka la pynpaw ba ka lynti ban pynïaid pisa kaba la pynbna ha u snem 2021 ka la ai jingmyntoi ïa ka ioh ka kot, bad ka sorkar kan pyrshang ban pynpoi ïa ka jingduna pisa hapoh 4.5 percent ha u snem ban wan.
Featured Image: PIB
Leave a Reply