Budget 2024: Pyllait khajna iaki lai tylli ki dawai jingpang bampong

Syllad | The Rising MeghalayaJuly 24, 2024

Ka Myntri Pla Tyngka jong ka Sorkar Pdeng, ka Nirmala Sitharaman ka la pynbna ban pynlait noh ia ki lai tylli ki dawai jingpang bampong (cancer) – Trastuzumab Deruxtecan, Osimertinib, bad Durvalumab—na ka bai custom duty ha ka por ba ka pynbna ia ka Union Budget 2024-25 ha Parliament haka 24 tarik Naitung. Kane kala wan jia long da ka jingkyrpad na ka Ministry of Health and Family Welfare (MoHFW) sha ka Ministry of Finance halor ka jingdon jong 27 lak ki nongpang cancer ha ka ri. Ban ban pynduna iaka dor ban kot bor ki nongthied ban thied iaki dawai, ka Ministry of Finance ka la pyllait ia ki ka custom duty.

Ki lai tylli ki dawai cancer kiba kynthup ia ka Trastuzumab Deruxtecan, Osimertinib bad Durvalumab ki dei ban pyndonkam ha ki jait tumor kiba pher:

Trastuzumab Deruxtecan – Breast Cancer; Osimertinib – Lung Cancer; bad Durvalumab – Lung Cancer bad Biliary Tract Cancer

Ka Myntri Pla tyngka ka la pynkylla ruh ia ka custom duty halor ki X-ray tubes bad flat panel detectors. Kine ki jingkylla kin ai jingmyntoi ia ka tnad shna X-ray machine da kaba pynheh ia ka jingdonkam jong ki component ha ka dor kaba jem. Kane ka jingpynbeit thymmai la khmih lynti kan ai jingmyntoi ia ka tnad shna tiar sumar ha ka ri da kaba pynheh ia ka jingdonkam jong ki component ha ka dor kaba jem bad pynjem ia ki jinglut ha ka koit ka khiah, ban pynbiang ia ka advanced medical imaging ha ka dor kaba jem bad kaba lah ban ioh.

Ka jingpynlut ha ka National Health Mission (NHM) ka la kiew kumba T.4000 klur na T.31,550 Klur sha T.36000 Klur. Ka NHM ka dei ka Central Sponsored Scheme kaba kynthup ia ka Primary bad Secondary Healthcare service delivery hapoh ka ri. Ka thong jong ka Sorkar kalong ban bei tyngka ha ki jaka sumar ban pyntrei na ka bynta ban iada bad pynkoit iaka jingpang ban pynduna iaka jingpynlut na ka pla ki paidbah.

Ban pynmih ia ka jinglah ban pyntrei kam, ki lad ai kamai, bad ban wanrah iaki buit thymmai da ki riewshimet, kane ka mang tyngka la wanrah da ka jingthmu ban pynbha ia ki Digital Public Infrastructure (DPI) haka jingbun briew. Kine ki jingthmu kin pynheh ia ki bynta bapher, kynthup ia ka credit e-commerce, education, health, law and justice, logistics, MSME services, delivery, bad urban governance.

Shuh shuh, kane ka mang tyngka ka thong jong ka ban shna ia ki 100 weekly “haats” ne street food hubs ha ki bynta jong ki sor kiba la jied. Kane ka jingthmu ka long ban kyntiew iaka ioh ka kot jong ki nongdie madan, kaban iarap shuh shuh iaka jingpynroi sor da ka jingiatreilang ki nongshong shnong.