Buh ia ka Isolation Ward & Nodal Centre ban iakhun Coronavirus ha MCH Hospital Panaliar

Syllad | The Rising MeghalayaMarch 23, 2020

Ka tnat ka koit ka khiah ha West Jaiñtia ka la shim ia ka rai ban buh ia ka isolation ward ne ka jaka kaba kyrpang ia kiba ioh pang COVID-19 ne Coronavirus ha Civil Hospital Jowai kaba don ha Ialong, West Jaintia Hills District.

Ka Civil Hospital Jowai ka don tang 100 jingthiah kaba kynthup lang ia ki rangbah ki longkmie bad khynnah bad ka long tang ma ka Hospital Sorkar na bynta ki paidbah jong ka Ri lum Jaintia namar ha East Jaintia Hills District ka dang don tang ka CHC ha Khliehriat.

Ka Civil Hospital Jowai kam banse ban pdiang ia ki nongpang palat ia ka jingthiah kaba la mang kaba mut bunsien ki nongpang ki poi palat sha ka 150 ngut namar ka Hospital ka hap pdiang ym tang ia ki nongpang, hynrei wat ia ki briew kiba mynsaw na ki jingaksiden kali bad kumta ter ter.

Ki riewpyrkhat pyrdain jong ka Nongbah Jowai kiba ym kwah pynmih kyrteng satia ki la ong ba lehse ka rai jong ka tnat ka koit ka khiah ban buh ia ka Isolation Ward ha Civil Hospital Jowai kam long satia kaba biang ha ki ba bun ki liang.

Ki la kdew ba katei ka Hospital kan nym lah ban kyntait ia ki nongpang kiba pang ia ki jingpang ba bunjait bad ia kiba mynsaw na ki aksiden kiba bunjait te ka hospital kan sa khapngiah nalor ba ka la dei lypa ka hospital kaba rit te kan don beit ka jingma ba u ne khniang jingpang yn sa saphriang sha kiwei pat ki nongpang.

Kaba ar ka long ba ka tnat ka koit ka khiah ka klet lehse ba ia ki nos bad doctor kiba ngat ha ka jingsumar sukher ia ki nongpang Coronavirus kin nym lah ban wanphai sha la iing la sem namar kin sa pynsaphriang ia u khniang jingpang Coronavirus te kumta kin hap ban sah ne don beit ha hospital.

Kaba lai ka long ba ka jingrung jingmih jong ki kali sha ka Civil Hospital Jowai ka long kaba bun bad kane kan sa wanrah jingeh ia ki kali ba kit nongpang bad kumta ter ter.

Kaba saw ka long ba haduh mynta kam pat don satia kawei ka jaka pdeng kaba baroh ki tnat kiba iadei kam kin iashong lang hajuh ban khmih kumno ban iada ia u khniang jingpang Coronavirus ne kumno ban sted treikam lada u la poi sha ka Ri Lum Jaintia.

La iathuh shuh shuh ba wat ki doktor ki nurse ruh kane ka district ka duna bha nalor ki tiar ki tar kum ki Ventilator u tiar uba iarap ban ring mynsiem ha Civil Hospital Jowai dang artatien ba kane ka hospital kan don.

Ki la buh jingkylli ruh haduh katno tylli ki tyndong ne cylinder oxygen ki don katno tylli ki oxygen kit ki tiar ba pyndonkam ban pynring mynsiem, haduh katno tylli ki personal protective equipment (PPE) na bynta ki nurse doctor bad kiba trei ha hospital baroh ki don ha Jowai.

Ki la buh jingkylli ruh hato ki handwash, ka um, ki gloves, ki inject, ki dawai dashin ki la biang lut bad shuh shuh mano ban pynbiang bam pynbiang dih ia ki nongpang bad ki doctor ki nurse bad ki nongtrei hospital?

Hato ki Ambulance kiba la biang ban leit shaw nongpang bad hato ka Sorkar Jylla ka la mang kano kano ka petrol pump kaba yn pynthikna ba ka petrol ne diesel kan nym duna ia ki Ambulance bad kiwei de ki kali sorkar ba donkam ha kane ka kam.

Hato ka Sorkar ka la long kaba la pynkhreh lypa kumno ban leh lada jia ba jia ki jingjia ba sngewsih khlad noh na kane ka jingpang Coronavirus.

Kitei ki riewrangbah ki la ai jingmut ia ka Sorkar Jylla ba ka dei ban pyndonkam ia ka Building jong ka Maternity & Child Hospital (MCH) kaba don ha Panaliar kaba ym shym la pyntreikam satia haduh mynta kum ka jaka pdeng ne ka Nodal Centre jong ki tnat baroh kiba iadei kam ban iada na u ne u khniang jingpang kum ka Control Room jong ka Health Department, ki ophisar ka tnat Disaster Management, ki ophisar ka Health Department bad kiwei kiwei de.

Ki la ai jingmut ruh ba buh ia ka Isolation Ward ban sumar ia ki nongpang Corona Virus ha MCH, Panaliar namar ka jaka ka bun bad ka heh bad ki doctor ki nors ki lah ban sah ha katei ka jaka.

Shuh shuh ki la ai jingmut ba ki pulit ki la ban cordon ne khang lynti na baroh arliang jong katei ka Hospital ha Panaliar khnang ba nym ai lad ia ki kali paidbah ban leit shajan katei ka Hospital kum ka lad ka jingiada.