Buh jaka ka Shangpung Moosyiem bad ka Sailung Ialong haka semifinal 1st Div ka WJDSA

Syllad | The Rising MeghalayaNovember 2, 2022

Ka Moosyiem Shangpung kala jop da 5-1 pyrshah iaka Sailung Ialong haka jingiakhun 1st Division Football Tournament kaba pyniaid da ka West Jaintia District Sports Association (WJDSA) kaba long ha Kiang Nangbah Stadium haka sngi Balang.

Ia kine ki kol ka Moosyiem Shangpung la thep mar ar kol da u Kenny Langbang (15′, 84′) bad u Remine Papang (27′, 52′) bad shikol da u Mewothi Sungoh (61′).

Ka Sailung Ialong kala ban thep shikol lyngba u Mebakynsai Pale (59′).

Da kane ka namjop ka Moosyiem kala wan haka kyrdan top team na ka Pool B bad ka Sailung Ialong kala wan ba ar. Kine ki ar tylli ki kynhun kila lah ruh ban pynthikna ban buh jaka ialade haka kyrdan jong ka semifinal mynta ka aiom ialehkai. Katba na ka Pool A kaba la thikna ban buh jaka sha ka semifinal ka dei ka Nangbah Iawmusiang bad hap ap sa ki katto katne ki jingiakhun kiba dang sah ha kane ka lympung shuwa ban jam artad sha ka kyrdan semifinal.

Lashai ka sngi Palei, ka jingiakhun kan long hapdeng ka Chilliangraij pyrshah iaka Wahiajer haka por 2:30 Pm.