Buh jaka ka Mulang, Mukhla Raij & ka Dulong haka semifinal Independence Day Cup

Syllad | The Rising MeghalayaAugust 10, 2023

Ka Mulang Ialong, Mukhla Raij bad Dulong ki la buh jaka ialade haka kyrdan jong ka semifinal haka jingialehkai Independence Day Cup Under-17 Football Tournamentkaba pyniaid ka West Jaintia District Sports Association (WJDSA).

Kane ka la wan hadien ba ki la khur nam jop haka jingiakhun quarter final kaba la long ha madan Kiang Nangbah Stadium Ladthadlaboh, Jowai haka sngi Balang.

Haba phai sha ka jingialehkai quarter final kaba nyngkong, ka Mulang Ialong ka la pynliem da 3-2 iaka Ladthadlaboh.

Ka Mulang Ialong kala pynkhih nyngkong iaka jar lyngba Jeri Dhar 12′, u Charelang Mulieh 51′ bad u Nidaroi Mulieh 60’+9. Na kaliang ka Ladthadlaboh la thep da u Teiborlang Malang 48′ bad u Medondor Pala 59′.

Ha kawei pat ka jingiakhun, ka Mukhla Raij kala jop da ka tie breaker da 4-3 iaka Niaw Wasa United. ka jingiakhun haka por kaba la buh ym don mano mano ba ioh pynkhih jar.

Haka quarter final kaba lai, ka Dulong pynliem da ka tie breaker da 4-3 iaka FAM. Ka jingialehkai haka por kaba la buh kala iakhaid mar 1-1. Ka Dulong kala ioh thep shuwa lyngba u Lovingstar Suting 28′, katba na kaliang ka FAM la thep da u P. Papang 33′.

Haba phai pat sha ka Third Division Football Tournament-3rd Adelbert Memorial Trophy, ka Lumchyrmang Mihmyntdu ka la pynliem iaka Nangbah Pohshnong da 2-0.

Iaki kol jong ka  Lumchyrmang Mihmyntdu la thep da u Yobiang Bamon 45′ bad u Pynchngain Phawa 49′

Ka jingiakhun Third Division haka 10 tarik Nailar kan long hapdeng ka Tympang Club pyrshah iaka Madankynsaw Mookyndeng haka por 10.30 baje mynstep, ka FAM pyrshah iaka Mookaswan Dongwah haka por 12.00 baje nohphai sngi, ka Mukhla Umlangshor pyrshah iaka Da i hi Mynsngat haka por 2.00 baje nohphai sngi.

Katba ka jingiakhun Quarter Final kaba saw haka Independence Day Under-17 kan long hapdeng ka Demthring pyrshah iaka Evergreen Mukhla haka por 3.30 baje nohphaisngi.