Buh jaka Nangbah Mulang haka final hadien ba pynliem da 3-0 iaka Ladthadlaboh ha ka Super Div WJDSA

Syllad | The Rising MeghalayaDecember 7, 2024

Ka Nangbah Mulang kala lah ha kaban buh jaka ialade haka kyrdan final hadien ba kala lah ban pynliem iaka Ladthadlaboh da 3-0 haka jingiakhun qualifier 2 ne semifinal kaba lai haka kyrdan Super Division Football Tournament kaba pyniaid da ka West Jaintia District Sports Association kaba long ha Kiang Nangbah Stadium haka 7 tarik Nohprah.

Da kane ka namjop ka Nangbah Mulang kan aireng pyrshah iaka Demthring ban iaknieh iaka nam lahduh mynta ka aiom ialehkai.

Haba phai sha ka jingialehkai mynta ka sngi, ka jingiakhun haka kylla step kala long kaba iakhaid khlem don mano mano ba ioh pynkhih jar. Dei haka kylla miet ka Nangbah Mulang kala tam shakhmat da shi kol kaba mih paw haka dur jong ka own goal kaba la thep da u Dangaitlang Mulieh (48).

Watla ka Ladthadlaboh kala shah tam da shikol, hynrei kane ka kol kala pynlong iaka ban iakhun tyngeh ban ñion iaka kut ialehkai ka Nangbah Mulang, kumjuh na kaliang jong ka kam shym la aili ban iakhun ban tehlakam iaka kut ialehkai ka jong ka.

Baroh arliang kila pyni iaka sur ialehkai kaba itynnad kaba pynshongshit ia u paidbah, hynrei ka Nangbah Mulang kaba la tam shakhmat kala bteng ban pyndonkam iaki buit ki bor bad pynkylla iaka rukom ialehkai bad dei tad haduh ka minit kaba 85′ kala thep sa iaka kol kaba ar lyngba u Timmy Ryngkhlem bad kane kala kylla long ka thong bah iaka Ladthadlaboh ban wanphai haka lynti jong ka jingiakhun, ia kaba ki player ka Nangbah Mulang kila lah ha kaban teh lakham iaka jingialehkai ha madan.

Ka kol kaba lai ka Nangbah Mulang kala wan haka minit kaba 90+2 lyngba u Niponghi Sumer kaba kylla long pat kum u prek bala sah khatduh haka synduk jong ka Ladthadlaboh.

Kumban shu pynkynmaw ba ka Nangbah Mulang ka dei ka kynhun kaba kaba shah pynliem da 1-0 haka Demthring haka qualifier 1, katba ka Ladthadlaboh kala jop da 2-0 iaka Wahiajer haka eliminator.