Buh jingkylli ka HNLC ba hato u Bah Cherishterfield u dang im kumba kam ki pulit?

Syllad | The Rising MeghalayaMarch 23, 2024

Ka Seng kieng atiar Hynniewtrep National Liberation Council (HNLC) haka 22 tarik Lber, ka la buh jingkylli ia ka tnat Pulit ba u General Secretary jong ka seng u Bah Cherishterfield Thangkhiew u dang im ne kumno, kata hadien ka jingkam ba ki dkhot ba shah kem jong ka ki la pynlong ka jingiakren bad u heh nongialam jong kane ka kynhun u Bah Sanbor Pala.

Ka HNLC ka la ong ba katkum ka kaiphot jong ka judicial inquiry ba la khlieh da u Justice (Retired) T Vaiphei la lam bad u Bah Cherishterfield Thangkhiew bad u Sanbor Pala ki dei ki juh ki briew. Ka HNLC kala byrngem ruh ban siat iap ia ki heh pulit kiba don bynta halor ka jingiap jong u Bah Cherishterfield.

U General Secretary-cum-Publicity Secretary ka HNLC u Bah Sainkupar Nongtraw lyngba u kyrwoh u la ong, “Kalong kaba sngewkyndit ban shem ba ka Tnat pulit ka la kam ba lyngba ka audio recording kaba kynnoh ba uwei napdeng ki suba dkhot ka HNLC uba la shah kem u la iakren bad u nongialam ka HNLC u Bah Sanbor Pala, kata ka jingkam kaba la pynklumar jingmut hi ia ka Tnat pulit.

U la buh jingkylli ruh da kaba ong, “Hato ka Tnat pulit mynta ka mut ban ong ba u (L) Cherishterfield Thangkhiew u lah ban dang im? Sa katno ki riew lui lui kin kylla long ki langknia ha ki pulit ka Jylla tang namar ka jingsuba ba ki dei ki Sanbor Pala? Sa mano ki ban ngat? Hato ki nongialam Sengbhalang tang namar ka jingsuba ba dei u Sanbor Pala?”

 “Lada jia ba ki ioh kem ia u Sanbor Pala uba shisha, ngin ym lah ban len ne iada ia ka jingshisha. Peit kumno ki la kem bakla ia u Bah Tarson Lymba u nongialam ka Seng HNYF halor ka jingsuba donkti pynbthei bom IED,” ong u Bah Nongtraw.         

Nalor kata u la ong ruh ba katkum ka judicial report 2022 ba la khlieh da u Justice T Vaiphei, ki pulit ki la kam ba u Bah Cherishterfield Thangkhiew ne Sanbor Pala u dei uba donkti ha ki kam dawa pisa bad pynbthei bom IED.

 “Kane ka jinglong jingman ka lam ruh sha ki artylli ki mat ba kongsan: Kata ka jingpulom jong ki bor syntiat pulit bad ka jingshukor ia u paidbah, Sengbhalang bad kiba haiing hasem jong u Bah Cheristerfield ba u Bah Cherist u dei u Sanbor Pala bad uba la treikam da kane ka kyrteng sin.Ka jingpyniap ia u Bah Christ ka dei ka jingsiat iap ba la subbuit lang da ki riewsain hima kynthup ia katto katne ki Myntri kiba don hapoh ka sorkar MDA.”

Nalor kata da kaba pynpaw ba ka HNLC ka la ithuh ia ki briew kiba don bynta halor ka jingiap jong u Bah Cherish, u Nongtraw u la ong, “U heh pulit uba don bynta halor ka jingshah siat iap jong u Bah Cherish un sa ngat ha ka jingeh. Ngi pynthikna ngin lapdien ia phi bad ngin pynshitom bad khrai khlieh ia phi. Ki jingiai thok bad ki jingpyrshang jong ki pulit ban buhrieh ia ka jingshisha kila paw shai kdar”.

Une u nongialam ka Seng u la ong ruh ba ka jingkam ba ka HNLC ka ialam bakla bad pynngop ia ki samla da kaba thong da ka pisa bad ki kali ka buh ia ka jingkylli halor ki kam kiba la leh hi da ki bor jong ka ain.

 “Ngi la iohi ba ka Sorkar Jylla bad Sorkar Pdeng kumjuh kila ai khusnam ia ki heh pulit bad ki shipai kiba leh ia ki kam thombor, pynshitom bein, pyniap bad set along ia ki nongialam riewlum bad ki nongshong shnong ba lui lui da ka pisa, ka jingpynkiew kyrdan, ribbon, medal bad kiwei kiwei ki khusnam” ula ong.

Shuh shuh ula ong ba ki samla ka Bri Hynniewtrep ki don ia ka hok ban ioh  khusnam na ka Jaidbynriew ne na ka HNLC lada ki ieng ban iakhun pyrshah ia ki nongthombor kiba buh jingma ia ki briew jong ngi bad ia ka Ri jong ngi.