Buh jingkylli ka HNLC ia ka rai khot hajir ki pulit ia ki nongialam Sengbhalang

Syllad | The Rising MeghalayaJune 28, 2024

Ka Seng Hynniewtrep National Liberation Council (HNLC) ka la kynthoh tyngeh ia ka Tnat Pulit halor ka jingkynnoh khot hajir ia ki nongialam Sengbhalang na ka bynta ban tohkit halor ki kam kiba iadei bad ka Seng.

Ka HNLC ha u kyrwoh ba la pyllait da u General Secretary cum Publicity Secretary u Bah Sainkupar Nongtraw ha ka 28 tarik mynta u bnai ka la ong, “Haba u Champion Sangma uba dei u heh pulit barim (DSP), bad katto katne ki dkhot ka tnat pulit kiba la phet na ka kam ban pyniasoh sha ka Seng GNLA, ngi la iohi ba na ka liang ka Sorkar kumjuh ka Tnat Pulit kim shym la khot hajir ia kiwei pat ki heh pulit. Hato ka long kaba shonghok ia ka Tnat pulit ba kan khot hajir ia ki president jong ka kynhun Sengbhalang haba don ki katto katne ki dkhot jong kine ki kynhun kiba pyniasoh sha ka HNLC da la ka jong ka mon?

Nalor kata u la kam ruh da kaba ong, “Hooid ki lah ban don ki dkhot jong ki kynhun Sengbhalang kiba don jingiadei bad ngi, hynrei kane kam mut ba baroh kawei ka kynhun seng, lane u president ne general secretary ki don bynta.”

“Ngi kum ka kynhun ngin ym shukor lada ki don ki dkhot kiba shitrhem la ki dei na ki Sengbhalang lane ki riew shimet. Kum ka nuksa u Tarsan Lymba um dei satia uba donkti ha ka jingjia pynbthei bom IED, hynrei na ka liang ka sorkar ka la kem ia u khlem ki sakhi satar kiba biang. Haba ki pulit ki kem rumar khlem ki sakhi kiba biang, kane ka lah ban ktah slem slem ia ka bor pyrkhat pyrdain jong kito ki riew shimet,” u la ong.

Une u nongialam ka HNLC u la ong ba ki don ki khep ha kaba ka jingkem jong ki pulit ia ki suba dkhot ka HNLC ka lam sha ka jingjia ba sngewsih kum ka jingkhlad kyndit jong ka kurim na ka jingpang kyndeh klongsnam ne ‘heart attack’ bad ka jingshah ktah jong une u suba ha ka bor pyrkhat pyrdain. “Kaei ka ban jia lada ki pulit ki kam bakla ia ki briew kiba dei ki nongkamai ban pyndap ia ka iing ka sem?

 “Watla ka Seng ka lah ban pynphai kylliang ha ka rukom jong ka jingrahbor lane pyniap klumar ia ki suba nongsyntiat ki pulit, hynrei ngi kum ka Seng ki kiar na kiba kum kine ki jingleh khlem da ioh ia ki sakhi satar kiba biang,” ong u Bah Sainkupar.

U la ong ruh ba ha ka jaka ban pynleit jingmut halor ka mat kaba iadei bad ka jingkynrei jong u drok, hynrei na ka liang ka sorkar bad ka tnat pulit la iohi pynban kumba ki pynlut ia ka por pynban ha kaba pynngat bad kem ia ki samla.

 “Kane ka jingkynrei jong u drok ha ka imlang sahlang ka jong ngi la iohi ba ka dei pynban ka jingthmu ba sniew sha lyndet jong ka sorkar.U drok u ktah ia ki briew shimet kumjuh ia ka imlang ka sahlang ka jong ngi. Hynrei, la iohi ba ka sorkar ka jied ia ka lynti  ban pynmih jingeh ha ka jaka ban weng ia ki,” u la ong.

Nalor kata u la kynnoh ruh da kaba ong, “Ka jingkhynra ba dang shen jong ka seng HYC ha kaba uwei u samla u la pdiang halor ka jingpyndonkam drok ba la ioh pdiang lyngba u pulit ka kynhun SWAT, ka pyni halor ka jinglong jingman ha ki kam khaii drok. Kane ka iasyriem bad ka kam khaii dewiong beain ba la ia don bynta da ki heh sorkar, bad u Myntri Rangbah bad Myntri Kam Pohiing ki dei ki nongkhaii drok ba shyrkhei.”