Buh jingkylli u Bah Pala hato kiba la ioh license tih dewiong kin lah bud ryntih iaki kyndon

Syllad | The Rising MeghalayaMay 5, 2023

U MP ka Shillong u bah Vincent H Pala u la ong ba ban ioh ia ka license ban tih dewiong kam don jingeh, hynrei ban bud ia ki kyndon kan dei ka jingkylli bad na kane ka daw, watla ialade u don par dewiong kaba heh hynrei um treh ban aplai ia ka license.

U Bah Pala uba dei ruh u President ka Meghalaya Pradesh Congress Committee haba kren bad ki nongthoh khubor haka sngi Palei u la ong “Ka kam tih dewiong ka dei ka kam kaba pyrkhing bha kaba hap ban bud ryntih iaki kyndon aiñ. Ban ioh ia ka License ban tih dewiong ka dei kawei ka bynta, hynrei ban bud ia ki kyndon ka dei sa kawei pat ka bynta kaba jwat bha.”

U la ong ba ki kyndon ki kylla na ka por sha ka por bad dei ban peit la kita kiba ioh ia ka license ki bud ne em ia ki jingbthah. “Ngam don jingkyrmen than namar la jan shi milian ngut kiba shaniah ha ka kam dewiong ha ka jylla. Ka jingkhang tih dewiong ha ka jylla kala ktah jur ia ki paidbah ka jylla.”

“Lada ki saw ngut kila ioh license ban tih dewiong, katno kin lah ban pynmih dewiong, kumno ia kiba dang sah kan leh bad ka jingkmen ka sorkar ka long tang kum ka drama,” la buh jingkylli u MP ka Shillong.

Katkum ka jingong u bah Pala, ki kyndon ki long kiba pyrkhing bha bad lada don tang khyndiat ki jingbakla, yn kynduh mawsiang syndon. “Ngin hap ban peit kumno ka sorkar jylla kan bud ia kine ki jingbthah, bad tang shu bakla tiak la kynduh mawsiang,” u la ong.

“Ki don 17 ngut kiba aplai License, hynrei ki ioh tang 4 ngut namar ba ka sorkar ka la pan ia ki jingdonkam kiba bun jnit. Lada ka sorkar jylla ka sngew khia ban iarap ia ki trai jylla khamtam ka tnad kaba peit u Myntri Rangbah balei kam phah lut ia ki aplikeshon sha ka sorkar pdeng namar ba ki jaka hangne ki dei jong ki riew shimet. Ka jingbym phah ia ki aplikeshon jong kiwei ka long kumba khang lad ia ki. Ka sorkar ka dei ban ym leh shiliang,” la ong u MP.

U Bah Pala ula ong shuh shuh “Nga ruh nga don ka par dewiong kaba heh, hynrei ngam aplai namar nga tip ia ki ain tih marpoh khyndew kiba pyrkhing bha bad kumno yn pyrkhing. Watla kan don ka jingpyrkhat kyrpang ia ki trai jaka ha kane ka jylla da ka jingiarap ka Supreme Court, hynrei yn peit kumno ka sorkar jylla kan bud.”