Buh jingkylli u Bah Paul Lyngdoh ba jah ka Article 371 na ka manifesto ka VPP

Syllad | The Rising MeghalayaFebruary 6, 2025

U Nongialam ka United Democratic Party (UDP) uba dei ruh u Myntri Sorkar, u Bah Paul Lyngdoh haka  5 tarik Rymphang u la buh jingkylli halor ka jingbym lah jong ka seng Voice of the People Party (VPP) ban kynthup ia ka Article 371 ha ka manifesto jong ka elekshon Autonomous District Council (ADC) ha Ri-lum Khasi Jaintia.

Ka VPP ha ka manifesto jong ka elekshon MLA 2023, kala kular ban pynbor ia ka Sorkar Pdeng ba kan pyntreikam lang ia ki kyndon ban pynioh ia ki jingiada ba kyrpang ia ka Jylla Meghalaya hapoh ka Article 371 jong ka Riti Synshar ka Ri India.

Katkum ka jingpynpaw jong u Bah Paul u la ong ba ka VPP hadien ba ka la shah jied ha u 2023, ka la dei ban shim ia ka resolution na ka bynta ban pyllait noh mardor ia ka Meghalaya na ka Sixth Schedule bad ban pyntreikam da ka Article 371.

Haba kren sha ki lad pathai khubor, u Bah Paul u la ong, “Ka ka Article 371 kala jah rngai na ka manifesto jong ka VPP na ka bynta kane ka elekshon sha ki District Council.”

“Hooid, ka long ka jingbatai kaba donbor bad da ka jingshemphang ha kaba phi pynpaw ia ka manifesto ka jong ka VPP. Nga tharai ki paidbah ki dei ban tip ia kata. Phi (VPP phi kren shaphang ka Article 371) phi lah ban don ei ei na ka rynsan jong phi bad kane ka juh ka la jah na ka manifesto jong phi. Kata ka mut ba ka don kaei kaei kaba ka party kam pat shai bha, bad nga ju bteng ban ong ia kane kum ki nongialam nyngkong eh phi dei ban don ka jingmut jingpyrkhat kaba shai,” u la ong da kaba bynrap, “Phim lah ban shu pyrshang ban rung shaduh shapdeng eh jong ka bor ha KHADC, bad dawa Article 371 bad hadien shim smai kum ki MDC namar phin hap ban shim smai ban bat ia ki nongrim jong ka Sixth Schedule kaba Article 371 ka pyrshang ban pynduh.”

Une u nongialam ka UDP u la iai ban ruh ia ka jingpynbeit jong ka sorkar pdeng ba ki jaka kiba ka Sixth Schedule ka la treikam kan ym don satia ka lad ban ioh pyntreikam sa ia ka Article 371.

“Ka long kaba shai kdar ba ka Sixth Schedule bad ka Article 371 kim lah satia ban ia iaid ryngkat ha kajuh ka jaka,” u la ong. 

U Bah Paul u la ai nuksa ruh ia ka Mizoram ban pynskhem ia kane ka nongrim jong u da kaba ong, “Ka nuksa kaba shai kdar ka long ba ka jylla Mizoram kaba ka Article 371 ka treikam ha baroh kawei ka jylla lait noh ki laitylli ki ADC, ia kiba la thaw ban peit ia ki jingdonkam jong kiwei pat ki paid riewlum, kaba mut ki riewlum ha Mizoram ki bym dei ki Mizo. Baroh ki bynta jong ka Mizoram ki hap hapoh ka Article 371 kaba mut ba kim lah ban don lang ha kajuh ka por ia ka Article 371 bad ka Sixth Schedule, bad dei na kata ka daw la thaw ia ki laitylli ki ADC ha Mizoram ban peit ban khmih ia ki jingdonkam jong ki riewlum ki bym dei ki Mizo hapoh ka jylla Mizoram.”

Nalor kata une u nongialam ka UDP u pynkynmaw ruh ba u la pyrshah jur ia ka resolution ba la wanrah da u President ka VPP uba dei ruh u MLA ka Nongkrem, u Bah Ardent Basaiawmoit ban pyntreikam ia ka Article 371 ha Meghalaya ha ka jingialang dorbar hapoh ka Iingdorbar thaw ain kaba la long ha u snem 2015.

Kumta ruh u la ong ba ka UDP kan iai bteng ban pynshai sha ki paidbah balei ba ka Article 371 kam dei ka lynti kaba biang na ka bynta ka Jylla Meghalaya.

U Bah Paul u la kdew ruh ïa ki nuksa kum ka Land Transfer Act kaba trei kam ha baroh Meghalaya lait noh tang ha ki lai tylli ki jaka hapoh Shillong namar ba ka jylla baroh ka dei ka Scheduled Area.

“98% ka Meghalaya la pyllait na ka Citizenship Amendment Act (CAA), kaba trei kam tang ha ki jaka kiba dei ki normal wards ha Shillong, namar ba ka jylla ka hap ha ka Sixth Schedule. Lada phin pyrshang ban pynkylla ïa kane, phin pynjot syndon ïa ka jinglong jylla jong ka Meghalaya,” u la ong.

U bah Paul u kob ruh iaka VPP ban shim ïa ka resolution halor ka Article 371 da kaba ong, “Lada ka party ka kwah ban pyntreikam ïa ka Article 371, ka sienjam kaba nyngkong ka dei ban shim ïa ka rai ban weng noh ïa ka Sixth Schedule bad pyntreikam da ka Article 371. Kaba mut mar sien jop kin shim iaka rai ban pynduh iaka Sixth Schedule bad ngin hap haka Article 371. Hato lah ban leh? Ai ba nongthep vote kin rai?”

Haba kylli halor ka jingdawa ka NPP ban pynkhlaiñ ïa ki tribal areas, u Lyngdoh u la ong, “Ka jylla baroh ka la hap hapoh ka ADC. Haba peit ïa ka konstitwensi jong nga, ka Shillong West bad Jaiaw, ka hap hapoh ka municipal area hynrei ka long ruh ka Scheduled Area. Ka Council ka ai trading license bad ki MDC ruh ki don, kumta nga ïohi ba kam don kawei pat ka daw ka ban pynbeit shuh ïa kane.”