Buh kyndon ka Shnongpdeng iaki rawon ba khwai ha wah Umngot

Syllad | The Rising MeghalayaAugust 26, 2020

Ka Dorbar Shnong Shnongpdeng hadien ba kala lap ba laitlan ka rukom wan khwai dohkha ki rawon na kylleng ha Wah Umngot haka bynta ka thwei ‘Masiah bad Rijab’, ka bor shnong ban teh lakam iaka jingpur ka khlam COVID kala shim iaka rai ban shah iaki nongkhwai dohkha na ki shnong marjan naduh Pynursla (East Khasi Hills) bad naduh Amlarem (West Jaintia Hills) Kiba ju sngewjuh sngewjan ban wan khwai ha thwei “Masiah bad Rijab, halor kine ki kyndon ba pyrkhing ba la kdew harum.

1. La shah ban wan na surok ka ban rung sha ki parking bala pynkhreh daka shnong, kiba wan da ki kali.

2. Katkum ka jinglong jong ka thwei yn ym pdiang palat iaka 80 ngut haka shisngi ban wan khwai. Khnang ba yn lah ban leh iaka social distancing ha ki jaka khwai bad ban lait na ka jingialum paidbah.

3. Baroh ki nongwankhwai ki dei ban bud iaka jingbthah jong ka sorkar, kum ka social distance, sait khuid iaki kti bad ban deng bha iaki mask.

4. Kino kino kino ki nongkhwai ki bym bud iaki kyndon ban iada na u COVID, ka bor shnong kan hap kyntait ia kum kita.

5. Ka por ban shah ban khwai ka long naduh ka por 7 baje mynstep haduh ka por 5 baje janmiet.

6. Baroh ki nongkhwai kiba wan lyngba kane ka jingpynbeit jong ka shnong, kin hap ioh iaki token ne ka ticket bala pynkhreh daka shnong. Lymkumta yn ym lah ban pdiang ia kum kita ki nongkhwai.

7. Yn ym shah ban wan ialam khynnah khunlung shawah ne jaka khwai. Ka bor shnong ka lah ban kyntait iakum kita ki nongkhwai.

8. Yn ym shah ban rung laitluid shapoh shnong khlem da kynjoh ktien na ki bor shnong. Ki nongwankhwai kin hap pyndonkam iaka lynti rung bad mih kumba la kdew daka shnong.

9. Kane kan treikam naduh ka 29 tarik, August 2020 tad haduh ban da pynbna da kumwei.

Ka Dorbar Shnong Shnongpdeng ka kyntu ia baroh ban iatreilang khnang ba ka jingpynbeit jong ka shnong kin long kiba iaid beit ha kum kane ka por kaba don hapdeng ki jingeh na ka khlam COVID-19.