Buh maw nongrim u CM Conrad iaka karkhana sain musli musla ba T.15 klur ha Bhoirymbong

Syllad | The Rising MeghalayaAugust 10, 2024

U Myntri Rangbah Conrad K Sangma, haka 9 tarik Nailar u la buh ïa u maw nongrim ban tei ïa ka karkhana sain musli musla kaba la tip kum ka Organic Spice Industrial Unit (PRIME-HUB) ha Bhoirymbong, Ri-Bhoi District.

Kane ka karkhana ka hap hapoh ka jingpeit jong ka Department of Agriculture and Farmers’ Welfare. Bad ka ban jingpynïaid da ka Eastern Ri-Bhoi Organic Farmer Producer Company Ltd.

Kane ka jaka sain musli musla ka don ka thong ban kyntiew ïa ka jingpynmih mar bad kyntiew iaka dor, kaba dei kaba jait mar rep ba kongsan ka thain. Kane ka karkhana kan ym kut tang ha kaban sain ia u sying, hynrei kan long ka karkhana kaba lah ban sain ia kiwei ki musli musla kynthup ia u shynrai, murit bad kiwei kiwei ban pynlong ia kane ka karkhana kaba heh tam haka thain shatei lam mihngi.

Haba kren ha ka jingïalang, u Conrad K Sangma u la ong, “Ha ki snem ba la leit, ka sorkar jylla ka la kyrshan ïa ki kynhun bapher bapher, ki seng treikam, Cooperatives societies, ngi la lah ban shna shibun ki karkhana sain jingbam bad ka jingpynïar ïa ka jingdonkam sha ki nongrep. Ngi pynleit jingmut ha kine ki karkhna jingbam, shibun ki ki karkhana kila mih ha kylleng ka jylla. Kane ka unit ruh kan iarap ïa ki hajar ngut ki nongrep ha kane ka thain. Ngi la ai T. 15 klur na ka sorkar, na kane ka pisa T. 12 klur kan long kum ka jingpynshlur bad T. 2 haduh 3 klur kan long kum ka ram na ka bank. Ngi sngew kmen ba lyngba kine ki karkhana sain musli musla kum u shynrai bad kiwei ki mar rep ha kane ka thain, ki nongrep kin ïoh iaka lad ban pyniaid iew hangne bad ban shalan.”

U Myntri Rangbah u la kular ba kin don shuh shuh shibun kum kine ki karkhana processing unit kiba buh ha kiwei ki bynta jong ka jylla. U la pynpaw ruh ïa ka jingdonkam ka Ri Bhoi, khamtam ka Umroi bad Bhoirymbong, namar ba ki long ki jak aba iaid lyngba ba pyniasoh iaka thain shatei lam mihngi bad ka ri baroh kawei.

U Bah Revistar Kharumnuid, CEO jong ka Ri Bhoi Organic Farmer Producers Company Ltd u la pynpaw ïa ka jingsngew sarong bad kmen halor ka jingjop kaba khraw jong ka company. U la ong ba ka jingkiew jong ka company ka pynpaw ïa ka jingtrei shitom bad ka jingkiew shaphrang naduh ba sdang ha u snem 2017. U la ong ba ka thong jong ka company ka long ban kyntiew ïa ki nongrep ha ka thain bad ban pynïar ïa ki rukom rep organic jong ka Meghalaya. U Kharumnuid u la ong ba ka company ka la sdang da ka jaka treikam kaba rit hynrei mynta ka la pynïar ïa ka jinglah ban pynmih haduh 18 metric tonnes shisngi.

Kane ka karkhana thymmai ym tang ba kan kyntiew iaka jingpynmih mar bad ka jingpynbha ha ka rukom sain musli musla, hynrei kan pyniar iaka iew ha ki iew ka pyrthei. U la ai khublei ruh ïa ka jingkyrshan pisa lyngba ka Meghalaya Industrial policy bad ka UNNATI scheme, kaba la pynlong ïa kane ka project kaba lah ban urlong. U la ong ruh ba kane ka unit kan pynmyntoi ïa palat 4,500 ngut ki nongrep. Ka company ka la ïasoh ruh bad 10 tylli kiwei ki FPOs na ki district bapher jong ka jylla. Ka jingpynmih kaba la buh thong shisnem kan long 4700 metric ton bad ka jingtrei kan long 264 sngi shisnem. Ka thong ban ïoh jingmyntoi ha ki lai snem kan long T. 18.71 klur, 24.94 klur, bad 27.68 klur.

Ha kane ka jingialang plie nalor u Myntri Rangbah; kiba iadonlang ha kane ka sngi ki kynthup iaka Dr. Mazel Ampareen Lyngdoh, Myntri, Department of Agriculture & Farmers’ Welfare; Damanbait Lamare, MLA, Umroi Abhilash Baranwal, IAS, Deputy Commissioner, Ri Bhoi District; Gunanka. D. B. IFS, Executive Director & Addl. Project Director, MegLIFE, MegARISE, MBDA; Revistar Kharumnuid, CEO, Ri Bhoi Organic Farmer Producer Company Ltd.; ki ophisar jong ka Department of Agriculture & Farmers’ Welfare; MBMA, FPC Farmers bad kiwei pat.