Buh mawnongrim ban tei iaka Integrated Block Complex ka Amlarem C&RD Block

Syllad | The Rising MeghalayaDecember 2, 2022

Ka long ka sngi sah jingkynmaw ïaki nongshong shnong ka thaiñ Amlarem, hadien 40 tylli ki snem bad mynta ka kynti ki la ïoh kumba 2 klur 77 lak tyngka ban tei ïaka Integrated Block Complex ne ka block ophis kaba thymmai.

U Myntri ka tnad C&RD ka sorkar Jylla u Bah Hamletson Dohling haka jingdonlang u Myntri ka tnad kam pohiing ka sorkar Jylla u Ma Lahkmen Rymbui uba long ruh u MLA ka thaiñ, ki ophisar bad ki paidbah nongshong shnong ula wan ban buh iaka u mawnongrim ban sdang tei haka sngi Balang ha Amlarem.

U Hamletson Dohling haka jingkren ula ong, kadei ka sien kaba nyngkong eh haka history jong ka Jylla Meghalaya ha kaba la ïoh 120 klur tyngka ban tei thymmai ïaki 46 tylli ki ophis jong ki block ha baroh kawei ka Jylla Meghalaya.

“Dei tang kane ka sorkar MDA kaba ïalam da u Conrad K Sangma kaba nud ban shim ïaka sien jam kaba eh ban pynbha ïa baroh ki 46 tylli ki Block ophis hapoh ka jylla”, la ong u Bah Dohling.

Ula ïathuh ba 6 tylli ki ïing treikam jong ki block kiba la mang haka dor 2 klur 50 lak tyngka la dep ban ïaid shakhmat ïaka jingtei jong ki bad kaba sah mynta ka long ïaki 40 tylli kiba la mang mar 2 klur 77 lak tyngka.kawei.

Lada ki ophis treikam jong ki block ki long kiba rim ki don bun bah ki jingdkoh haka rukom treikam khamtam sha nongkyndong kaba ki paidbah ki kham juh ban rung haki ophis jong ki block namar lyngba ka block ophis ba la pyntreikam ïa kiba bun bah ki skhim ba pynïaid da ka sorkar jylla bad sorkar kmie, la ong u Bah Dohling bad bynrap ba ka jingdon jong ka Block kadei ka jingkieng kaba pun ïaka jingïadei hapdeng ki paidbah bad ka sorkar.

Ula ïaroh ruh ïaki nongtrei ka Amlarem Block ba kadei kawei na ki Block kaba la pyntreikam bha ïaka skhim shispah sngi bad kane ka urlong dei lyngba ka jingïatreilang ki nongïalam shnong bad paidbah nongshong shnong.

Ula pynpaw ka jingkmen ban ïohi ba ki longkmie nalor ba ki bun kam ha ïing hasem hynrei ki mih shakhmat ban ïakynduh para longkmie ban thaw haduh 590 tylli ki SHG bad 71 tylli ki VO na bynta ban kyrshan da lade ïalade bad na bynta ka bit ka biang ka roi ka par jong ka shnong ka thaw.

U Bah Lahkmen Rymbui haka jingkren ula ka ophis Block kadei kaba donkam tam na bynta ka jingdonkam jong u paidbah namar shibun ki jingdonkam jong u paidbah ki ïadei bad ka Block.

Ula ai khublei ïaki ophisar kiba ka trei naduh u snem 1982 haduh kiba mynta ki trei shitom na bynta ban pynbit pynbiang ïaka jingdonkam jong u paidbah bad u kyrmen skhem ba lyngba ka ïing treikam ba thymmai yn lah ban kdup lut ïaki jingdonkam jong u paidbah ha baroh ki liang.

“Kum ki nongmihkhmat ngi trei jar jar bad ngim kwah ban put turoi ïa kaei kaba ngi la leh hynrei lada phai hapoh ka Amlarem Constituency ka don shisha ka jingkylla”, la ong u Bah Rymbui.

Ula ïathuh ruh katto katne ki skhim kiba ula wanrah hapoh ka Constituency kynthup naduh ki skul Primary 10 tylli kiba la dep shna haka dor kaba 37 lak tyngka bad yn dang ïoh shuh sa 10 tylli haka dor 44 lak tyngka lyngba ka Border Area bad kiwei ki skhim.

Nalorkata ka surok Pdengshakap haduh Muktapur kadei kawei naki surok ba la sniew tam bad mynta yn pyntrei noh ïaka ban suk ka leit ka wan jong ki paidbah haka jinglut kaba 20 klur tyngka.

Ka surok na Samanong kaba 2 kilometre shiteng la dep khot tender bad kumjuh ka surok hapoh Ïongnoh shi kilometre shiteng, ka surok Mupyut 2 kilometre bad 1 kilometre ha Pynthor ula ong ba kine kidei tang ki project kiba dang ïaid bad u kyrmen da ka jingïatreilang ki paidbah ka thaiñ yn lah ban kyntiew ïaka roi ka par bad ka ïoh ka kot.

Kiwei de kiba la ai jingkren ki long u Director ka C&RD u SC Sadhu, IAS, u Deputy Commissioner, West Jaintia Hills u Bah Batlang S Sohliya, IAS bad kiwei.