Buh mawnongrim ka War Jaintia Presbytery ban tei iaka ïing treikam ha Amlarem

Syllad | The Rising MeghalayaSeptember 8, 2023

Ka War Jaintia Presbytery ka la buh ïa u maw nongrim ban tei ïaka iing treikam kaba pura jong ka, ha jaka kaba don ha Kynram Masi Pnu Amlarem, West Jaintia Hills District.

U Moderator War Jaintia Presbytery u Rev. PRL Gadew kum ka dak ban sdang noh iaka jingtei ula puh shi mohkhiew haka khyndew bad plie ia u maw sah nam. La iashimbynta ruh kiwei kiwei ki nongialam bad ki dkhot ka Building & Construction Committee haka sngi Palei.

U Tymmen Basan WK Lamin Chairman Building & Construction Committee ula iathuh ba ka War Jaintia Presbytery kadei kaba dang lung ka rta bad ka ioh iala ka jong ka Presbytery dang ha u snem 2015. Kumta ban pynbha iaka jingtreikam ka presbytery ki nongialam da kawei ka jingmut kila rai ban shna iaka iing treikam kaba paka. Kane kala urlong mynta hadien bala ioh iaka jaka 17 hajar square phut da jingialam lynti U Blei bad ka jingtreiborbah jong ki balang bapher bapher kiba don hapoh ka presbytery ban sei iaka pisa.

Ula iathuh ba ia mynta ka War Jaintia Presbytery kan tei shuwa iaka mala kaba shapoh. Kane ka iing kan kynjoh ka jingpynlut shaduh T.3 klur, hynrei wat la tymbuin haka liang ka pisa pilain, la rai ban sdang iaka kam. Ula kyntu ia iaki lai tylli ki District kata, ka Thangbuli, War Mihngi bad War Sepngi District ban ai ka kyrshan iaka Presbytery khnang ban lah ban tei pyndep iaka la kumno kumno hapoh ki lai snem eiei.

U Moderator War Jaintia Pressbytery u Rev. PRL Gadew haka jingkren ula ong, kane ka dei ka burom kaba khraw kaba U Blei ula leh ia ka War Jaintia Presbytery bad iaki Balang baroh kiba don haka, namar ka dei lyngba ka jingai bad ka jingkyrkhu ka jong U iaki rympei iing khristan bad ka jingsbun mynsiem ki khun ka balang kaba la pynlong ia ka Presbytery ba kan ioh ban buh noh ia u maw nongrim ban tei iaka shlem treikam kaba pura jong ka.

Ula ong, ka lynti kaba ka Presbytery kan iaid, kan dang long kaba kham eh shuh shuh hynrei ngin kynmaw pat ban buh haki jingduwai ba U Blei un iarap iaki nongialam bad ia baroh ki dkhot jong ka War Jaintia Presbytery ba U Blei un pynioh haki ia kata ka jingmut jingpyrkhat kaba sngewkhia iaka kam bad don ka mynsiem noh synniang katba lah synei na ka bynta ka kam kaba kyntang jong U Trai.