Buh mawnongrim u CM ban shna ia ka madan football artificial turf ba 10 klur ha Umbuda, Ri Bhoi

Syllad | The Rising MeghalayaMarch 5, 2024

U Myntri Rangbah ka Jylla u Conrad K Sangma ha ka 5 tarik Lber u la leit ban buh ia u  mawnongrim na ka bynta ban shna ia ka madan football Artificial Turf kaba nyngkong eh hapoh Ri Bhoi ha ka madan ialehkai kaba don ha ka shnong Umbuda, Ri Bhoi ia kaba la mang ban pynlut haduh T. 10.93 klur.

Haba kren ha ka jingialang u CM u la ong ba ki khynnah bad ki samla donsap kin lah ban pynpaw iala ki sap ki phong bad wanrah medal bad ka nam ia ka jylla tad lada kin ioh ia ka lad ka kabu ba la plie na ka bynta jong ki. “Kane ka dei ka thong jong ka sorkar ba ngin iai bteng ban kyntiew ha ka liang ka sports bad ia ki jingtei na ka bynta ki jingialehkai sports,” u la ong.

U CM u pyntip ba mynta ki projek kiba kot sha ka T.700 klur la pyntreikam na ka bynta ban thaw ia ki jaka ialehkai sports bapher bapher ha ka jylla bad jan kumba T.400 klur la mang na ka bynta une u snem mang tyngka u ban wan ban shna ia ki jaka ialehkai sports.

Nalor kata u la ong ruh ba ka sorkar ka la mang T.2800 klur na ka bynta ban kyntiew ia ki samla ha ka liang ka sports, ka tem ka put, kolshor bad halor ka sengkam seng jam kaba thmu ban kyntiew ia ki sap ki phong jong ki samla.

Haba kren kyllum halor ka roi ka par, u Conrad u la ong ba lada ka Jylla ka dei ban kiew shaphrang, yn ym lah ban pyrkhing ne ban pynleit jingmut tang ha ka nongbah Shillong, Tura bad Jowai, hynrei sha man la ki shnong bad ki constituency ha ka Jylla ki dei ban kiew shakhmat.Nalor kata u la pynbna ruh ba ka Ri Bhoi shen kan sa ioh ruh ia ki track kumjuh ki field stadium.

Ha kane ka prokram la ia don lang ruh u Myntri ka Tnat Sport ka jylla u Bah Shakliar Warjri, u MLA ka Nongpoh u Bah Mayralborn Syiem, u MLA ka Jirang Bah Sosthenes Sohtun lem bad ki Ophisar ka State Sports Council, ka Directorate of Sports & Youth Affairs bad ki kynhun bapher bapher napoh Ri-Bhoi.

Shuh shuh u CM u kyntu ruh ia ki samla kiba la iashim bynta ha Kang ka prokram ba kin pyndonkam hok ia la ki jong ki sap ki phong kiba ki don bad ba kim dei ban pynlehnoei ia kane ka jingai ba kyrpang da U Blei da kaba iaid sha ka lynti kaba bakla.