Buh mawnongrim u CM ban tei ia ka Rongjeng Stadium ha ka jinglut kaba 9.25 klur ha East Garo Hills

Syllad | The Rising MeghalayaOctober 13, 2023

U Myntri Rangbah ka jylla u Conrad K Sangma haka sngi Palei u leit buh ia u mawnongrim na ka bynta ka jingtei ia ka Rongjeng Stadium hapoh East Garo Hills ha ryngkat ka jingiadon lang u Myntri ka Tnat Sport u Bah Shakliar Warjri bad ki MLA kiba kynthup ia u Jim Sangma bad u Rupert Momin.

Ka jingmang ban pynlut na ka bynta ka jingtei ia kane ka stadium ka long T.9.25 klur, kaba kynthup halor ka jingpynbha ia ka madan ialehkai football bad ka jingshna ia ka gallery paidbah.

Haba kren ha ka jingialang u CM Conrad Sangma u pynkynmaw halor ka thong jong u kpa jong u, u (L) PA Sangma uba don ia ka jingiadei kaba jan bha bad ka  Rongjeng kumjuh bad ki briew jong ka.

U la ong ruh ba ka thong ban pynioh Sub Division ia ka Rongjeng lem bad kiwei pat ki jaka treikam ki ban wan sha kane ka thain ka dei ka thong bad ka jingangnud jong u (L) PA Sangma na ka bynta ka Rongjeng.

Haba kren halor ka jingkyntiew ia ki jaka ialehkai sports, u CM u la ong ba ha kine ki san snem kiba la leit noh, kata naduh u snem 2018 na ka liang ka sorkar ka la pynlut haduh palat T.400 klur haba ia nujor bad ki 45 tylli ki snem kiba la leit noh.U la pynbna ruh ba ha ki san snem ki ban wan, yn pynlut haduh kumba T.1000 klur na ka bynta ban tei ia ki jaka ialehkai sport ha kylleng ka jylla.

“Naduh ba la ioh ia la ka jong ka jylla haduh u snem 2018, kam shym la don palat ka jingpynlut na ka bynta ban kyntiew ia ki kam ialehkai sport, hynrei ka sorkar MDA ka la sngewthuh halor ka jingkongsan jong ka sport bad ngi la wan ryngkat ki prokram bapher bapher ban kyntiew ia ki kam ialehkai sport ha ka jylla,” ong u CM.

U CM u la ong ruh ba ka sorkar jong u kan shim ruh ia ki sienjam na ka bynta pynbha ia ki 25 tylli ki madan ialehkai football ha ka jylla da kaba pynioh da u phlang plastik ne artificial turf, kata nalor kiwei pat ki jait jingialehkai sport khnang ba kan long ka jingmyntoi kaba khraw na ka bynta ki samla ialehkai.

Nalor kata u pyntip ruh ba ia ka Meghalaya Games 2023 yn pynlong ha Tura mynta u snem ha kaba yn wan iashim bynta da haduh kumba 3000 ngut ki riewialehkai na kylleng ka jylla.

“Ka jingphaikhmat ka jong ngi ka long ban pynioh ia ki jaka ialehkai kiba paka bad ban pynthikna ba ki samla ialehkai jong ngi ki ioh ban pynpaw ia la ki jong ki sap ki phong lyngba ki rynsan ialehkai bapher bapher,” ong u CM.

Kiwei pat kiba la aijingkren ha kane ka sngi ki kynthup ruh ia u Myntri ka Tnat Sport uba la pynpaw ba na ka liang ka sorkar ka don ia ka jingkut jingmut ban kyntiew ia ki kam ialehkai sport ha ka jylla.

Shuh shuh ha kane ka sngi la pynkut noh ruh ia ka jingialehkai final ‘MLA Cup’  hapdeng ka United Shallang FC bad ka  Balbarian Sports Club Rongjeng.