Buh mawnongrim u CM ban tei ia ka Secretariat bathymmai kaba kot T.1188 klur ha New Shillong

Syllad | The Rising MeghalayaJanuary 22, 2025

U Myntri Rangbah ka Jylla u Conrad K Sangma ha ka 21 tarik Kyllalyngkot u la leit buh ia u Mawnongrim na ka bynta ban tei ia ka Secretariat kaba thymmai ha Umsawli, New Shillong ha ka jingiadon lang ki Symbud Myntri Rangbah, u Bah Prestone Tynsong bad Sniawbhalang Dhar, Ki Myntri sorkar u Abu Taher Mondal, Kong Ampareen Lyngdoh, Marcuise Marak bad u Comingone Ymbon.

Ia kane ka Secretariat yn tei ha ka jaka kaba heh 53 akar bad ka ban kot T.1188 klur. Ia ka Secretariat bad ka Directorate campus yn pyntrei ha ki artylli ki bynta ne phase. Ka Complex kan don 68 tylli ki ophis, ka Auditorium ka ban ngiam 700 ngut ki briew bad ki kamram na ka bynta ki 1829 ngut ki nongtrei.

Ka phase 2 jong ka complex ban tei ha ka jaka kaba 1.25 lak sq.m ka jaka kan dei kaba la mang ia ka Directorate ryngkat 56 ki ophis, ki kamram ia ki 4746 ngut ki nongtrei bad 2 ki auditorium ki ban ngiam mar 200 ngut ki briew.

Kane ka jingbuh Mawnongrim ia ka Secretariat ka la wan long ruh ha ka sngi ba la rakhe ia ka lyngkhuh snem kaba 53 jong ka jylla kaba pyni ia ka jingkut jingmut jong ka sorkar ban pyniaid shakhmat ia ki kam pynroi kiba iadei bad ki jingtei bapher bapher hapoh ka jylla.

Ha ka jingkren u Myntri Rangbah u la ong, “Kam dei satia tang ka building bad ka jingtei ka ban sa mih, hynrei ka dei ka jingpyniar ia ka nongbah jong ka Shillong.

Halor ka jingpynwandur ia kane ka Secretariat bathymmai, u Conrad u la ong, “Kane kam dei satia ka video kaba la shna da ka AI, hynrei kane ka dei ka jingpynwandur jong ka jingtei ba shisha ka ban sa mih ha kane ka jaka, kaba la shimpor ia ngi la palat shi snem ban pynkhreh.”

Haba shim ia ka Administrative bad Knowledge City ka ban mih ha New Shillong kum ka ‘Growth Centre’ u la ong,, “Haba ngi bei tyngka na ka bynta kane ka Secretariat, haba ngi bei tyngka na ka bynta kiba bun ki surok kiba pyniasoh ia ka nongbah kiba la don lypa bad kane ka Administrative City ba thymmai, ngi la buh ia u Mawnongrim na ka bynta ki shnong ki thaw, na ka bynta ki paidbah, ki trai jaka ha kumba 30 sqkm ba kin pynroi ia kane ka New Shillong baroh kawei kum ka jaka ka roi ka par ba kongsan ka jylla jong ngi.”

Nalor kata u la pyntip ba ka sorkar ka don ruh ia ka jingthmu na ka bynta ka jingbei tyngka ka ban kot haduh 5500 klur ban pynroi ia ki bynta jong ka New Shillong kynthup ia kumba T.10,000 klur ka kam bei tyngka kaba dang pynkhreh.

“Kane ka jingbei tyngka kan pynkylla dur pura ia ka New Shillong,” u la ong da kaba bynrap ba ka Secretariat Building kan long kum ka nongwanrah jingkylla ban pynthikna ba ngi lah ban pyniaid shakhmat ia kane ka jingphohsniew ka jong ngi.

Katba na ka liang u Dy.CM u Bah Sniawbhalang Dhar ha ka jingkren u la ong ba kane ka jingtei kaba thymmai ka dei kaba la buh nongrim na ka bynta ban pynkupbor ia ka lawei jong ka jylla.

Kumjuh u Bah Prestone Tynsong Dy.CM u la ong ba kane ka Secretariat bathymmai ka dei kaba la angnud da u Myntri Rangbah ka Jylla u Conrad K Sangma ban pynthikna ba ki jingshakri jong ka sorkar bad ka kam synshar khadar kan beit noh na kane ka sorbah bathymmai jong ka sor Shillong.

Ha kane ka sngi, u Myntri Rangbah ula pyllait paidbah ruh ia ka skhim kaba T.63 klur na ka bynta ki 6000 ngut ki nongioh jingmyntoi kiba dei na ka CM-ELEVATE, FOCUS, Green Meghalaya+, ki project kam jngohkai bad kiwei kiwei.