Buh mawnongrim u CM ia lai tylli ki projek kynthup ia ka Water Supply Scheme ha New Shillong, ka skim um ba heh tam ha Jylla

Syllad | The Rising MeghalayaMarch 11, 2024

U Myntri Rangbah ka Jylla u Conrad K Sangma ha ka 11 tarik Lber, u la leit ban buh Mawnongrim na ka bynta ki laitylli ki projek kiba kongsan kiba kynthup ia ka New Shillong Water Supply Scheme, Land reclamation project ha ka Waster Processing and Disposal site ha Marten Mawlai bad halor ka jingshna ia ki lynti surok hapoh New Shillong Township ha Mawkhanu, Mawpdang.

Na ka liang u Symbud Myntri Rangbah u Sniawbhalang Dhar, u Myntri ka Tnat PHE u Marcuise Marak, ka Myntri ka Tnat ka koit ka khiah ka Dr. Ampareen Lyngdoh bad u Chief Secretary ka Jylla u D.P Wahlang ki la ia don lang ha katei ka jingialang ba la pynlong ha Mawkhanu, Mawpdang.

Haba kren ha ka jingialang, u CM u la ong, “Kane ka New Shillong Water Supply Project kaba kot sha ka T. 1600 klur ka dei kawei na ki projek kaba heh tam ia kaba na ka liang ka sorkar ka la mang tyngka. Ia kane ka projek la mang haduh T.1,600 klur ha kaba haduh T.500 klur ruh la dep ban pyllait na ka bynta ka kylla kaba nyngkong bad ia kaba la buhthong ban pyndep hapoh ka 36 bnai,” u la ong.

U la ong ruh ba ka New Shillong Water Supply Scheme kan lah ban pynbiang um na ka bynta ka nongbah Shillong bad ka New Shillong Township kaba kynthup ia ki jaka pule puthi, ki ophis treikam kumjuh ia ki 32 tylli ki shnong bad ki nongshong shnong kiba don mynta kumba 29,889 ngut. Kane ka sienjam ka dei ruh kaba la pynkhreh lypa ban pynbiang um sha kumba 198,997 ki briew kat haduh u snem 2042, kumjuh na ka bynta 413,701 ki nongshong shnong haduh u snem 2057.

Ha kaba iadei bad ka jingshna ia ki surok hapoh New Shillong Township, u CM u la ong ba la shna ia ki lynti surok ha Mawkhanu ha ka jinglut kaba T.185 klur. U pyntip ruh ba ka jingshna ia ki surok hapoh New Shillong Township ban pynsuk ha ka liang ka leit ka wan kaba kot sha ka T.343 klur ka la iaid shakhmat hapoh New Shillong kynthup na Ummir sha Mawkhanu bad Kynoton sha Lyngkien, Bellefonte sha New Township, na Diengpasoh sha Shillong bypass bad na Bribah Mawpat shapoh New Township.

Katba ha ka kylla kaba ar ka jingshna ia ki surok, ka lynti surok kaba 16.6 km bad kaba iar 15 mitar bad ka surok 2 lane kaba iar 7.5 m la tyrwa na ka bynta ka jinglut ka ban kot sha ka T.185 klur, bad ia kine ki surok la khmih lynti ba yn lah ban pyndep ha u snem 2026.

Katba ha kaba iadei bad ka Land Reclamation Project ha ka Waste Processing and Disposal Site hapoh Marten ha Mawlai, u CM u la ong ba ka jaboh ba la pynlang ha kane ka jaka kam dei tang ka jingsngewkhia na ka bynta ki nongshong shnong hapoh kane ka thain hynrei na ka bynta ki nongshong shnong ka Jylla hi baroh kawei. U la ong ruh, “Ngin pynkylla ia kine ki jaboh sha ki mar ki mata ia kiba ngi lah ban pyndonkam biang bad ngin pyndep ia kane ka projek hapoh ka 12 haduh 18 bnai.”

U la ong ruh ba ia ka jaka lum niut yn pynkylla sha ka jaka kaba ki paidbah kin lah ban pyndonkam bad kane kan long ruh kum ka nuksa kaba lah ban leh ha kiwei kiwei pat ki jaka jong ka jylla. “Ka sorkar ka la pynkhreh ruh ia ka ‘roadmap’ ban kyntiew shuh shuh ia ka roi ka par ka jylla bad ka jingkylla na ka bynta ki paidbah nongshong shnong,” u la bynrap.

“Kine ki saw snem ki ban wan kan dei ka por kaba kongsan bha na ka bynta ka Jylla bad ki nongshong shnong jong ka.Ka New Shillong Township kaba kynthup ia ka sorbah jong ka jingnang jingstad  ka sorbah jong ki jaka treikam ne “Knowledge City and the Administrative City” la dep ban mang T.10,000 klur ban kyntiew ia ka roi ka par, bad ka ban plielad ruh na ka bynta ka jingaikam aijam ka ban kot haduh 50,000 tylli,” ong u CM.