Buh mawnongrim u CM na ka bynta ka jaka pynmih Ngap kaba kot T.1.52 klur ha SWGH

Syllad | The Rising MeghalayaJuly 24, 2024

U Myntri Rangbah ka Jylla u Conrad K Sangma ha ka 23 tarik Naitung u la leit ban buh ia u mawnongrim na ka bynta ka jingshna ia ka Apiculture Multi Facility Centre ha Mellim, South West Garo Hills ha ryngkat ka jingiadon lang u Myntri ka tnad Pule puthi u Rakkam A Sangma nalor u MLA Sanjay A Sangma.

Ia kane ka jingtei la mang ha ka jinglut ka ban kot sha ka T.1.52 klur ia kaba la aiti sha ka Mellim Area Beekeepers Society, ha kaba la pyllait ruh ia ka bhah pisa kaba nyngkong na ka bynta kane ka project kaba long T.67 lak. Kane ka project ka kynthup ia ka jingshna ia ka building, ka surok, kynroh bad ki tiar ki tar ban pynkhreh ban pynmih bad pynlang ia ka ngap.

Ki don haduh kumba 200 ngut ki nongrep kiba don bynta ha ki kam ri ngap ha Mellim. Ia ka rai ban tei ia kane ka centre la shim katkum ka jingai jingmut da ka Beekeepers Society hadien ka jingleit jngoh jong u Myntri Rangbah ia kane ka thain ha ka 6 tarik mynta u bnai.

“Ka dei ka jingpyrshang ka jong ngi kum ka sorkar ban phaikhmat bad shimkhia ia ki jingangnud jong ki paidbah bad ban thaw ia ki lad ki lynti ban pyniar ia ki kam khaii pateng. Nga ngeit skhem ba kane ka centre ha Mellin kan lah ban kyntiew shuh shuh ia ka kam pynmih ngap bad kan pynthikna ruh halor ka jinglah ban pynmih ia ka ngap kaba bha bad ka bym don jingkhleh,” ong u Myntri Rangbah.

Nalor kata u la pyntip ruh ba ka sorkar ka la ithuh ia ka kam ri Ngap, rep Syntiew bad rep tit kum ki prokram ba kongsan hapoh ka ophis jong u Myntri Rangbah ban pyniaid shakhmat ia ki prokram da ka mishon. “Halor ki rukom treikam, ngin shim ia ki project halor ki laitylli ki mishon, kata ha Khasi, Jaintia bad Rilum Garo ia kaba ngan buddien da lade hi,” u la ong.

Kumjuh u la ong ba kane ka project kan nangpynkup bor ia ki nongri ngap ha Mellim bad kan treikam ruh kum ka centre na ka bnta ki kam aijinghikai.

U la ong ruh ba nangne shakhmat ka sorkar kan kyntiew ia ki jingmih lyngba ka nap kum ka jingpynmih ia ka wain na ka umngap kaba don ruh ia ka dor kaba heh ha ki iew ki hat jong ki ri ka pyrthei.

Ha kaba iadei bad ka jingkyntiew ia ka rep ka riang, u Conrad u la ong ba ka sorkar ka la buh ia ki Processing Unit ha ki bynta bapher bapher ka Jylla khnang ban kyntiew ia ka dor jong ki mar rep. “Ha ka thain Rongara ba pajih ha South Garo Hills, ka sorkar ka la buh ia ka Jackfruit processing unit, kaba pynmih ia ki Chips lyngba u Sohphan bad kiwei kiwei., kata ym tang ba ka la kyntiew ia ka nam na ka bynta ki chips sohphan hynrei ka la kyntiew ruh ia ka jinglong jingman jong kiba bun ki nongshong shnong ha katei ka thain.”

U Myntri u la pyntip ruh ba ka sorkar ka la trei borbah ban pynkylla ia ka ioh ka kot ha ki thain nongkyndong da kaba pynleit jingmut ruh ha ka rep ka riang nalor ki bynta kiba don ka jingiadei bad kane ka bynta kaba lah ban wanrah ia ka jingkylla. “Kum ka sorkar ngi la kyntiew ia ki SHG, ki kynhun pynmih mar na ka bynta ban tei ia ka ioh ka kot ha ki jaka nongkyndong. Ha kine ki khyndia snem ki ban wan, ki nongrep jong ngi ki dei ban lah ban noh synniang shibun na ka bynta ka roi ka par jong ka jylla Meghalaya hi baroh kawei,” u la ong.

Shuh shuh haba kren biria u la ong ba u ‘Awang Chips’ kaba mut Uncle Chip ka Rongara bad u Nokma (nongialam shnong) Ice Cream ka Tikrikilla ki la ai ia ka nuksa ia ka thain ba ki mar rep jong ngi ki lah ban pynlong ia ka kyrteng bad ka ban aijingmynroi shibun ia ki paidbah.