Buh mawnongrim u Myntri ka Sorkar Pdeng ban tei ia ka NECTAR ha Mawdiangdiang

Syllad | The Rising MeghalayaMarch 14, 2025

U Myntri ka Sorkar pdeng uba khmih ia ka Tnad Science and Technology u Dr Jitendra Singh ha ka 13 tarik Lber u la buh ia u mawnongrim na ka bynta ka North East Centre for Technology Application and Reach (NECTAR) permanent campus ha Mawdiangdiang, Shillong.

Ka NECTAR ka dei ka jaka pule kaba laitluid hapoh ka tnad Science and Technology (DST), Sorkar India, ka aiti ban pyndonkam ia ka teknoloji na ka bynta ka roi ka par ha ka imlang sahlang bad ka ioh ka kot ha ka thain shatei lammihngi.

U Myntri u la lei tjngoh ruh ia ki stall jong ka NECTAR ha IIM Shillong bad u la ïashim bynta ha ka jingthang ïa ka sharak ha ryngkat ki kynrem ki lyndan bad ki ophisar na ka Sorkar Jylla. Ha kane ka sngi la kynthup ia ka jingkren pdiang sngewbha bad ka jingpynshai na u Dr.Arun Kumar Sarma uba dei u Director General ka NECTAR.

Ha ka jingai jingkren jong u, u Dr Jitendra Singh u la pynpaw ka jingsngewkmen halor ka jingseng ïa ka jaka pule ba pura jong ka NECTAR bad ka State Technology Demonstration Centre, da kaba khot ïa ka kum ka “por ba kongsan” ha ka jingïaid lynti jong ka NECTAR. U la kdew ba ïa ka NECTAR la seng ha u snem 2014, u snem ba nyngkong jong ka Sorkar jong u Myntri Rangbahduh Narendra Modi, bad ka la nang pynïar ïa ka jingtreikam jong ka ha baroh 8 tylli ki jylla ka thaiñ Shatei Lammihngi.

“Ka NECTAR ka la roi naduh ba sdang hapoh ka jingkyrshan jong u Myntri Rangbahduh Narendra Modi. Ha kane ka sngi da la ka jong ka jaka, kane ka jaka pule ka buh ia ka nongrim kaba thymmai ha ka jingkylla jong ka thain shatei lammihngi”, u la ong.

U la ïaroh ïa ki sienjam jong ka NECTAR kaba kynthup ïa ka Mission Saffron, kaba la sdang ha u snem 2021, kaba la sdang ïa ka jingrep saffron ha ka thaiñ Shatei Lammihngi. “Ha u snem ba la dep, ngi la ioh ia ka GI tag na ka bynta u saffron jong ka Jammu bad Kashmir. Mynta, ka thaiñ shatei lammihngi ka don ka lad ban long ka jaka pdeng jong ka ri India ha ki kam ba iadei bad u saffron,” u la ong. U la ïaroh ïa ka jingseng ïa ka STEM Education Lab ha nongbah Shillong, kaba la pynwandur ryngkat ka jingïatreilang bad ka IISER Pune bad ka Smart Village Movement, ka ban pynkupbor ïa ki khynnah skul na ki 100 tylli ki skul da ki kor ki bor kiba thymmai kum ki kor electronics, robotics, bad 3D printing.

Nalor kata u la kren ruh shaphang ka bynta jong ka NECTAR ha ki drone teknoloji bad u la ai khublei ruh ïa ka jingpyrshang jong ka NECTAR ha ka jingpeit bniah ïa ka jingma na ka jingshlei um, da kaba pyndonkam ïa ka GIS bad ki lad remote sensing ban pynduna ïa ki jingma ha ki distrik Morigaon, Dhubri, bad Majuli. Haba iakren ia ka kam jong ka NECTAR ha ka kam ri ngap bad ka Honey Mission, u la ong, “Naduh ka kam ba iadei bad ki siejhaduh ka kam ri ngap, ka NECTAR ka pynpher ia ka jingktah jong ka ha kylleng ki bynta”.

U Myntri u la pynshlur ïa ka NECTAR ban wanrah ïa ka jinglong ba kyrpang, da kaba kyntu ïa ka jaka pule ban pynleit jingmut ha ki bynta ba kyrpang bad ban pyndonkam bha ïa ki jingdon jingem kiba iadei bad ka pule puthi, ki marpoh khyndew bad ki briew bad ai jingmut ïa ka ban long ka bor na ka bynta ka “Atmanirbhar Northeast” bad ka Viksit Bharat, da kaba pynïahap bad ka jingthmu jong u Myntri Rangbahduh ka ri, Narendra Modi na ka bynta ka jingkiew shaphrang ba ryntih jong ka thain.

Ha kane ka jingïalang la ïashim bynta da ki ophisar na ka DST, NECTAR, bad ki nongshim bynta ba kongsan na ki kynhun bapher bapher jong ka sorkar jylla bad Sorkar Pdeng.