Buh mawnongrim u Myntri Rangbah ka Jylla ban kyntiew kyrdan iaka madan ha Riangdo

Syllad | The Rising MeghalayaFebruary 3, 2024

U Myntri Rangbah ka jylla u Conrad K Sangma haka 2 tarik Rymphang , u la buh mawnongrim na ka bynta ban shna pynthymmai bad siang phlang plastik iaka madan football ka shnong  Riangdo, kaba don ha West Khasi Hills. Ha kane ka sngi lah donlang ruh da u Myntri ba khmih ïa ka tnad Sports & Youth Affairs Shakliar Warjri, u MLA, Mawshynrut, u Bah  Merthodus Dkhar bad u Deputy Commissioner, West Khasi Hills, Ma Garod LSN Dykes. 

Ha ka jingkren ha katei ka sngi u Myntri Rangbah u Conrad K Sangma, u la ong ba ka madan football ha Riangdo ka long kaba kongsan namar kane ka madan kam dei tang iaki nongshong shnong ka Riangdo, hynrei kumjuh ruh da ki shnong kiba don marjan kane ka shnong. “Nga tip ba ki don bun ki briew kiba lah kdat mynta sha la kijong kijong ki bynta ka jingim ki dei kiba ju ïalehkai ha kane ka madan, hynrei mynta la 52 snem ym shym la don ka jingbei ban shna pynbha kane ka madan”. Ha kajuh ka por u la pyntip ba mynta ka lah don ka jingmang kaba kot sha ka T.10 klur na ka bynta ka jingtei pynthymmai bad pynbha ïa kane ka madan bad lah buh por ruh ban pyndep hapoh ka 18 bnai. “Ka sorkar ka dei kaba lah don bynta ban shna pyndep kiba bun ki madan lehkai bad kiwei de ki jingtei ha kine ki san snem haba ïanujor bad kine ki 45 snem ba lah dep bad kane ka pyni shai halor ka jingaiti ka sorkar na ka bynta ka bha ka miat ki samla bad plielad ïa ki ba ki lah ban pynurlong ïa ka jingsngewtynnad ba ki don ha ki jait jinglehkai bapher bapheri” la pynpaw u Myntri Rangbah.

Haba kaba ïadei bad ka jingjop ka kynhun ïalehkai football na ka jylla ha ka Khelo India Youth Games hapdeng ba ka kynhun ïalehkai jong ki khynnah hapoh 18 snem ki lah jop pyrshah ïa ka Punjab u Myntri Rangbah u lah ong “ka long ka jingsngewsarong kaba khraw ïangi baroh hapdeng ba ki samla ki la lah ban wanrah ka nam jop bad ka khusnam sha ka jylla bad kane ka pyni ba ki khun samla jongngi kim shym lah sahdien shuh haba ïanujor bad kiwei pat.” U la ban da kaba ong ba ka sorkar ka donkam ban ai jingkyrshan ha ka liang ka jingshna pynbha bad pynthymmai ki madan bad kiwei ki jingtei, ka jingkyrshan pisa, bad ki kyndon pyntreikam ba ki samla ki lah ban  pyni la ki sap ki talen ha kiba bunjait ki jinglehkai bapher bapher.

Shuh shuh na ka liang u Myntri Rangbah u lah ong ruh ba ka Meghalaya Games kaba la long ka lympung ialehkai kaba manla u snem ka lah ruh ban long ha West Khasi Hills ha ka ki por ban wan hadien ba la pyndep bad shna pynbha ka madan.

“Ka dei ka sorkar kaba lah thaw ki kyndon treikam ban pynlong ïa ka Meghalaya Games ha ki distrik bapher bapher jong ka jylla khnang ba lah ban don ka jingshna pynbha ki madan ha kylleng ki jaka bad ba lah pat ban pyndonkam kylla da ki samla jong kito ki thaiñ jaka kiba don ka jingsngewtynnad ha ki kam Sport”.

Na ka liang u Myntri Rangbah u la kdew ruh halor ki lad jingïarap pisa bapher bapher, ka jingai khusnam da ka pisa bad ka jingai baibam da ka sorkar na ka bynta kito kiba lah ban wanrah takma khnang ba ki samla ki lah ban bud ka jingangnud jong ki ha ki jinglehkai sport.

“Ngin ym kut tang ha ki jingtei bad shna pynthymmai hynrei yn ïatrei ryngkat ruh bad ki Sport Association  bapher bapher ban nangpynkhlaiñ ki kam ba īadei bad ka sport.” .

U lah kyntu ruh ïa ki samla ban pynleit jingmut ban pynlut bor ha ki kam kiba bha khnang ba kin long ki nongshong shnong kiba lah ban tei ïa ka lawei bad don ka jingkitkhlieh.