Buh nam u Mebanker Shullai haka history ialehkai ka WJDBA jop biang iaka District Open Badminton ha Jowai

Syllad | The Rising MeghalayaAugust 14, 2022

U Mebanker Shullai, uwei na ki samla ialehkai ba paw ha Jowai ula buh nam ialade haka history ialehkai ka West Jaintia District Badminton Association (WJDBA) hadien ba ula jop biang iaka District Open Badminton Championship kaba 13 kaba la poi sha kaba kut haka miet Saitjain ha indoor hall ka Seinraij, Jowai.

Kane kan long ka sien kaba phra ia u Mebanker Shullai ban khur iaka nam lahduh haka Men’s Singles. Ha kane ka kynti ruh ula pynliem tang ar sets da 12-21, 12-21 ia u Gregoreo Passah.

Kine ki arngut ki samla ialehkai ka district dangshen haka Meghalaya Games ruh kila khur iaka takma ksiar haka Men’s Double.

Kumba long mynta, ka synjuk ialehkai ka Badminton kane ka district, lada ngi phai sha ki mynnor, ka WJDBA ka dei shisha tang maka kaba la ban saindur iaki nongialehkai ka District ha kaba la mih ki thei bad rang ialehkai ba kynsai hapoh ka district.

Ka jingtreishitom ka WJDBA, mynta ka Badminton kam long shuh ka jingialehkai kaba paw tang ha Jowai, hynrei kala paw ha Shangpung, Laskein, Khliehriat bad wat sha War Jaintia.

Ym lah khlem ban ai ka jingiaroh bad ka jingpyrto iaki nongialam ka WJDBA kiba mynta bad kiba mynshuwa kiba la lah shisha ban seng nongrim ha kata ka dur ban kyntiew ia kane ka kam ialehkai Badminton, wat hadpeng ka jingduna ki jingtei ne ki jaka ialehkai kiba katkum ka juk kaba mynta ba ki khynnah kin ioh kilan bad pyntbit ha kane ka kam ialehkai. Ka jingkhublei ka leit ruh sha ki bor shnong ha sor Jowai kiba la ai jaka naka por sha ka por ban pynlong ia kum kine ki lympung jong ka district ne jong ka jylla ban plie lad iaki khynnah bad samla ialehkai ban lehkai Badminton.

U kongsan ba donlang ha kane ka lympung ialehkai u dei u Dolloi Elaka Jowai ma Puramon Kynjing, haka jingdonlang u President WJDBA ma James M Pohsngap, u Working President ka WJDSA, u Ma EMH Passah, u Chairman bad Secretary Tournament Committee u ma Teddy Laloo bad u ma Richard Mylliem ki dkhot ka WJDBA bad kiwei.

Ki nongialehkai kiba la wan iashimbynta ha kane ka tournament ki long na kylleng ka rilum Jaintia kiba kynthup na Sutnga, Khliehriat, Shangpung, Wahiajer, Darang, Sohkha, ATS bad na sor Jowai. Baroh ki nongialehkai kila kynjoh sha ka 88 ngut kynthei bad shynrang.

Kane ka tournament kaba la neh hynriew sngi lynter, ki jingiakhun baroh kila kot haduh 102 tylli kuynthup Open Men’s & Women’s Single, Doubles, Mixed Doubles, 35+ Men’s Single, Men Doubles, 55+ Men’s (Single/Doubles).

U President WJDBA u Ma James Pohsngap haka jingkren ula pyntip ba ki lahduh haka kyrdan ‘Men’s Double Open’ kin leit mihkhmat ïaka Jylla haka lympung ïalehkai North East Zone Inter State Badminton Championship 2022 ka ban long ha Jylla Tripura bad kumba 30 ngut ki rang bad ki thei ïalehkai badminton ka district kin leit mihkhmat ïaka District haka lympung ‘State Championship’ ka ban long ha Tura.

Kine harum ki nongjop ha ki kyrdan ialehkai bapher bapher:

Ha ka jingïakhun haka kyrdan Women’s Doubles ka Ibalari Siangshai & Pretty Mary Sumer ki la khur nam lahduh da kaba pynliem ïaka Balashembha Passah & Emilanadaka da 21-19, 15-21, 24-22.

Haka kyrdan 55+ Men’s Singles u Lalmansiama ula khur nam da kaba pynliem ïa u Polestar Niangti da 18-21, 9-21.

Haka Women’s Singles ka Balashembha Passah ka la khur ïaka nam lahduh hadien ba la pynliem ïaka Ribhalang Passah da 14-21, 9-21.

Haka 55+ Men’s Doubles u Riki Challam & Wanmi Dkhar ki la khur nam lahduh hadien ba ki la pynliem ïa u Polestar Niangti & Sunday Morning Tariang da 12-21, 25-27.

Haka Men’s Singles Open u Mebanker Shullai ula khur nam lahduh da kaba pynliem ïa u Gregeores Passah da 12-21, 12-21.

Haka 35+ Men’s Doubles la ïoh rah da u Peterson Lamare & Damehi Kyndiah da kaba pynliem ïa u Rimilan Passah & Dauru Laloo da 14-21, 21-15, 21-17.

Haka Men’s Doubles Open u Mebanker Shullai & Gregoreo Passah ki la pynliem ïa u Rimilan Passah & Dauru Laloo da 18-21, 18-21.

Photo Credit: Rimilan Passah and DP Lamare