Buh tarik National Games 2022 noh ong ka IOA iaka Meghalaya

Syllad | The Rising MeghalayaMarch 24, 2021

Ka Indian Olympic Association ne ka IOA haka shithi kaba kala phah haka 16 tarik une u bnai sha u CEO ka Games Secretariat ha kaba ka la bthah ia kane ka ophis ba kadei ba kan khreh ba kan lum noh ia ka jingialang naka bynta ban ioh ban buh noh ia ka sngi ne ia ki tarik, khnang ba ka Meghalaya kan pynlong ia ka National Games 2022.

Katkum ka shithi ka jingpynkhreh ka Meghalaya ia kane ka lympung kan sah 1 snem 10 bnai kan pynlong iaka National games ha u snem 2022. U dak jingkylli uba mih mynta hadien ba la ioh pdiang ia kane ka kyrwoh na ka IOA ka long hato ka sokar MDA kala long kaba pynkhreh ban pynlong ia kane ka jingialehkai ba heh tam ha ka ri.

Ia ka kopi jong kane ka kyrwoh na ka IOA la  ioh pdiang ia ka da ka ki nongkitkam ka Meghalaya State Olympic Association bad hadien ba la ioh ban pdiang ia kane ka kopi, kila khih khohreh namar ba kaei kaei ruh ym pat i don, klet noh ia katta ka jingpynkhreh ia la ka kynhun ialehkai na kane ka jylla kiban iakhun ha kane ka lympung, pynban ka IOA ka  phah ia une u kyrwoh ban phah lum ia ka jingialang ban buh noh ia ka sngi ka ia ne ia ki tarik ba ha u snem u ban wan ban pynlong noh ia kane ka lympung bah National games 2022.

Kane ka kyrwoh na ka IOA kala wan hadien ba u CEO ka Games Secretariat u la phah ia ka kyrwoh ha u bnai Naiwieng jong u snem 2020 ba la dep sha ka ophis jong ka IOA, ban pyntip sha ki ba na ka liang ka sorkar Meghalaya, ka la don hapdeng katta ka thong ba kan pynkhreh naka bynta ban pynlong ia kane ka lympung bah ialehkai ba heh tam ka ri, ha u snem 2022 u ban wan, ba jia ryngkhat u snem ba kum ka jylla kan rakhe ia ka lyngkhuh snem kaba 50 ka jingioh ia ka jylla kaba pura.

Hadien ka jingioh ban pdiang ia kopi jong kane ka kyrwoh na ka IOA, ki dkhot ka MSOA ki la thaw ia ka Executive Committee kaba don san ngut ki dkhot, kaba kynthup lang ia u bah Banteidor Lyngdoh kum u President nangta u bah John F. Kharshiing Working President, Chiranjib Choudhury General secretary, ki arngut ki voice president ba kynthup ia u bah B. Diengdoh bad u bah Ian Lyngdoh bad u treasurer u ban Ksan Warjri.

Kane ka kynhun mar mar kala buh jingialang bad bah Banteidor Lyngdoh Myntri ka tnad Sport ha iing ka jong u haka sngi ba Ar ban iakren sani bha ia kane ka mat bad khamtam bala wan kane ka kyrwoh n aka IOA.

Kumban shu pynkynmaw ha Rilum Jaintia ki synjuk ialehkai bapher bapher kila thaw da ka forum kaba la tip kum All Jaintia Sports and Games Forum (AJSGF) namar ba ym shym la kynthup iaka Jaintia Hills ha ka National Games 2022.

Kane ka synjuk kala iakynduh ruh ia u Myntri Rangbah ka Jylla Conrad K Sangma, hynrei kam don kino kino ki dak ki shin ba ka Jaintia Hills kan lah ne ban ioh pynlong wat tang kawei ruh ka jait jingialehkai na kane ka lympung.