Buh thong ka Jylla ban ïarap 1000 ngut ki nongrep haka Shiitake Mushroom bad Training Centre ha Upper Shillong

Syllad | The Rising MeghalayaMarch 5, 2024

U Myntri Rangbah ka jylla u Conrad K Sangma haka 5 tarik Lber, u la plie ïa ka Shiitake Mushroom and Training Centre ba la bei pisa da tnad Tribal Affairs, Ministry of DoNER bad ka sorkar jylla ha Upper Shillong ha ka jingdonlang ka Myntri jong ka tnad Agriculture & Farmers’ Welfare, ka Kong Ampareen Lyngdoh.

Haba kren haka jingialang, u Myntri Rangbah u la ong ba ka sienjam ba la shim ka sorkar kalong ban kynthup lang ia baroh haka imlang sahlang katba ka jylla ka nang jam shakhmat.

“Ka jingtheh pisa kaba ngi la leh bad ki kam pynroi ba ngi la thawlad ki long lehnohei lada ka imlang sahlang kim lah ban kiew lang bad long shibynta haka jingkiew ka jylla Meghalaya,” la ong u Myntri Rangbah ka jylla.

U la pyntip ba ha kine ki lai snem ba lah dep ka sorkar jylla ka la theh pisa kumba T. 700 klur ban wanrah ka jingkylla bad pynbiang ki jingdonkam ba kongsan jong ki nongrep khnang ba ka kam rep jong ki bad ki mar ba ki pynmih kin long kiba shongdor bad lah ban khliehdor.  “Nga don ka jingngeit ba ngim donkam ban leh ki kam bathymmai hynrei ngi donkam ban ïarap iaki nongrep ban pynjanai iaka kam rep”.

U Myntri Rangbah u lah pyntip ruh ba ka thong halor ka jingshna bad don ka Shiitake Mushroom Production and Training Centre, ka dei ban ai jingïarap ïa ki 1000 ngut ki nongrep.  U la ong ruh ba ïa une u tit lah ban thung haduh laisien ha ka shisnem bad pynmih ka pisa kaba kot T. 1 lak ha shi sien thung. “Haba kheiñ kyllum tang hapoh lai snem T. 117 klur kan mih ka pisa kaban ioh da ki nongrep” la pynpaw u Myntri Rangbah.

U la pynshlur ruh ïa ki nongrep ba kin shim kane ka sienjam ban thung ïa une u tit namar ka jingduna ban bam jaka bad ka dawa tang 15 sngi ban trei ha ka shisien thung bad kata ruh tang ki jingdonkam ba kongsan.

U la ong ruh ba ka jingpynïaidïew ïa une u tit ka dei kaba la don lypa bad ka jylla ka don ka bor ban shalan sha kiwei pat ki jaka jong ka ri hapdeng ba ka lah dapbiang ïalade. U la bteng ruh ba ki nongrep ki lah ban ïoh baroh ki jingdonkam na ka sorkar.

Ïa kane ka projek lah pyndep ha ka jinglut kaba kot sha ka T. 15.15 klur. Kane ka jaka thung tit ka don ha Mushroom Development Centre, Upper Shillong. Ïa kane ka projek la pyntreikam ha ka jingsnohkti lang bad ka YATS Corporation Tokyo, ka jaka kaba jur tam ban pynmih ïa une u tit Shiitake ha ka pyrthei.

Kum shibynta ban kyntiew kane ka kam, la buh ruh ki shnat ban pynïaidïew ka kompeni ban thied ïa une u tit ka Shillong Shiitake Products Company Ltd (SSPL), kaba la snohkti lang hapdeng ka YATS Corporation bad Hill Farmer’s Shiitake Mushroom Co-Op Society Ltd (HFSMC). 

Lah ban kdew ba la mang T. 62.37 klur ka pisa halor ka Mushroom Mission na ka bynta san snem kynthih. Kumba ka long mynta ki don haduh 5000 ngut ki nongrep kiba lah ïoh jingmyntoi lyngba kane ka program. Ka jingkyntiew ban thung ïa une u tit ka dei kaba la shimkhia da ka tnad Agriculture hapoh ka jingpyntreikam ïa ka Mushroom Mission halor ki lai tylli ki païa kata ki – technology, ki jingpynïaidïew bad ka jingdon bynta ka imlang sahlang.