Buh thong ka skul Tia Chaphrang ban thung dieng uwei pa uwei u khynnah skul bad nonghikai

Syllad | The Rising MeghalayaApril 24, 2021

Ka Tia Chaphrang HSS, Sohkymphor da ka jingiatreilang bad ka Ophis jong u Range Forest Officer, Social Forestry, Khliehriat Range, East Jaintia Hills kala rakhe iaka ‘Earth Day’ haka 22 tarik une u bnai da ka jingthung dieng. Ka phang pdeng mynta u snem kalong “Restore Our Earth”.

Ha shwa ban thung dieng ka la don ka jingialang lyngkot ha kaba u ma Damewanhi L. Rymbai, Chairman jong ka Moolamylliang Biodiversity Management Committee, uba la long kum u kongsan haka jingiadonlang u bah B. Dhar, Forester, Khliehriat Range, u ma Kmen Lapasam, Waheh Chnong ka Sohkymphor Mission, u ma Sevenborn Tang, Ex- MDC JHADC, u ma P. Suiam bad ka kong Liancy Suchiang, ki trai skul lem bad ki dkhot ka SMC, ki Nonghikai bad ki khynnah skul.

Ha ka jingkren jong u ma Reachingson Siangshai, uwei na ki dkhot jong ka SMC, u la pynpaw ba ka skul ka la buh thong ban thung dieng man la uwei pa uwei u/ka  khynnah skul bad ki nonghikai baroh (One Student One Tree, One Teacher One Tree) ha une u snem, khnang ban iasnohktilang bad ki ri ka ka pyrthei ban pynwandur biang ia ka pyrthei (Restore Our Earth) katkum ka phang.

U ma Damewanhi L. Rymbai, ha ka jingkren jong u kum u kongsan, u la pynpaw ia ka jingdonkam ban leh ia kiba bun ki bynta khnang ban  lah pynwandur biang ia ka pyrthei da kaba kyntiew ia baroh ban kynmaw ia ki 3Rs (Reduce, Reuse & Recycle). Ula ong haba pyndonkam ia kiei kiei ki jingdonkam man la ka sngi dei pynduna (manage) ia ki jakhlia.

U la kyntu ruh ia baroh ban thung & sumar ia ki tynrai dieng khnang ba ngin ioh ia ka lyer (Oxygen) kaba khuid, khnang ban don ki um, ban iada ruh na ka jingtwa ka khyndew, ban ioh ia ki soh kiba tei ia ka met jong ngi bad kiwei kiwei ki jingmyntoi ia ki briew kiba ngi lah ban ioh na ki dieng.

U ma Rymbai u la ai jingmut ruh ia ka skul ban don da ka Eco Club bad register sha ka Forest Department khnang ba ka skul kan ioh ia ka jingiarap ha kaban poi thong katkum ka thong jong ka skul ha ka jingrakhe ia ka Earth Day bad ruh kan iarap ia ki khynnah ban sngewthuh shuh shuh ia ka jingdonkam ban sumar ia ka mariang bad ban wad lad ban pynbha ia ka.  

Ka Forest Department ka kloi ban iasnohkti lang shuh shuh bad ka skul ban ai tynrai dieng shuh bad kiwei kiwei ki lad jingiarap khnang ba kan poi thong, pynpaw u ma S. Dhar, Forester, Khliehriat Range ha ka jingkren jong u.

Kiwei kiwei kiba ai jingkren ha katei ka sngi ki long u ma Kmen Lapasam, Waheh Chnong, u ma P. Suiam,  ka Mayalang Suchiang, ka Merciful Lyngdoh bad ka Rikhienlang Sumar, baroh kiba dei ki nonghikai jong katei ka skul, ha kaba baroh kila pynpaw ia ka jingdonkam ban leh ia kiba bun ki bynta khnang ban lah pynwandur biang ia ka mariang.

Hadien ka jingialang, u kongsan u la ialam ha kaban sdang ban thung ia ki 100 tylli ki tynrai dieng ha pyllaw jong ka skul, bad la pynbud sa kiba shah khot sngewbha baroh ha katei ka sngi, ki trai skul, baroh ki nonghikai bad katto katne ki khynnah skul bad yn sa bteng ia kane da baroh ki khynnah skul ha ki por ki sngi ban wan, khnang ban lah ban iadonbynta ban pynwan dur biang ia ka mariang katkum ka phang mynta u snem ha ka jingrakhe ia ka Earth Day-2021.