Buh thong ka sorkar ban pyndep iaka Science bad Commerce College Mawphlang ha u bnai Jylliew

Syllad | The Rising MeghalayaFebruary 21, 2024

U Myntri ka tnad pule puthi u Rakkam A Sangma haka 20 tarik u Rymphang, u la pyntip ba ka jingshna ïa ka Science bad Commerce College ha Mawphlang yn pyndep hapoh u bnai Jylliew mynta u snem.

Ha ka jingjubab ki jingkylli hakhmat ka ïingdorbar, u Rakkam u la ong, “Ki klas kin sdang ynda la pyndep ka jingtei iaka buidling bad hadien yn thung iaki nonghikai bad ki nongtrei.

U la ong ba ïa ka jingtei la dep haduh 72 percent.

Ïa kane ka projek la dep ban mang haka jinglut kaba T.36.55 klur ha ka 30 tarik u Jylliew 2017. Haduh mynta ka pisa ba lah dep pynlut ka kot sha ka T.14.815 klur na kaba bynta kane ka jingtei.

U MLA ka Mawphlang u Bah Matthew B Kurbah u lah buh jingkylli hato lah ban pyndep ïa kane ka projek ha u bnai Jylliew, namar kam don kino kino ki dak ki shin ba pyntrei ia kane ka projek. U la kyntu ruh ïa ka sorkar ban pyllait kloi ia ka pisa kaba la mang ban pyndep mar mar iaka jingtrei.

Ha kaba ïadei bad kane, u Rakkam u la ong, hashuwa kane la buh thong ban pyndep ïa kane ka kam hapoh u 2020, hynrei ka kam ka la sahteng noh namar ka jingslem ban aiti ka jaka, ka jingpyllait iaka pisa jong ka bynta kaba ar bad ka jingwan lynshop ka khlam Covid-19.

U lah ïathuh ba dei haka 19 tarik u Rymphang ba dang pyllait ïa ka pisa jong ka bhah ba-ar ban pyndep ïa katei ka college sha ki agency ba pyntrei ïa ka kam. “Dei halor kane, ngi khmih lynti ban pyndep ïa kane ka kam katkum ka por ba la buh”.

U nongthawaiñ ka Nongkrem Bah Ardent Miller Basaiawmoit, ula buh jingkylli ha kaba ïadei bad ka jingpyntrei ïa ka kam khlem da aiti ïaka jaka sha ka sorkar. U Myntri Rangbah ka jylla u Conrad K Sangma u la ong ba ka sorkar ka long trai iaka jaka ha Mawphlang lyngba ka gift deed.