Buh thong ka sorkar ban pynioh ïing ia palat 1.40 lak ki longiing lyngba ka skhim PMAY, ong u CM

Syllad | The Rising MeghalayaNovember 30, 2023

U Myntri Rangbah ka Jylla u Conrad K Sangma haka 29 tarik Naiwieng, ula khot pynlong ia ka jingialang bishar kam ha kaba iadei bad ka jingpyntreikam ia ka skhim Pradhan Mantri Awas Yojana (PMAY) bad pyntip ba ka Meghalaya kala buh thong ban pynioh ïing ia palat 1.40 lak tylli ki longiing hapoh une u snem mang tyngka.

Haba kren sha ki lad pathai khubor, u Sangma u la ong ba mynta u snem uba kongsan bha ha kaba iadei bad ka jingpyntreikam ia ka PMAY. “Haba shu ia nujor ha kine ki saw snem ba la dep, ka thong jong ka sorkar jylla ka long ban pynioh kumba 40000-50000 tylli ki ïing bad ha une u snem ba mynta 2023-2024, ngi lah buh thong ban pynioh haduh 1.40 lak ki iing” ula ong.

Nalor kata u la ong “Kane kala wan urlong namar ngi la pynkhlain ia ka jingiakren bad ka Sorkar India bad ngi kwah ban buh ia ka thong ba lah ban pyndep ia baroh ki iing ba dang sah kiba don ha ka list”.

Shuh shuh u CM ka jylla u la ong “Ngi sngewtynnad ban pyntip sha phi ba ka Sorkar India kala ai ka jingiatreilang bad ngi la iakren na ka por sha ka por ia ki jingdonkam baroh bad mynta kala pyllait ia ka song pisa jong ka wat kaba ar. Kumba T.800 klur la dep ban pynlut bad jan baroh ki kam kila iaid shaid shaid bad ngi kwah ban iohi ba ki kam kin sa sdang noh ha baroh kine ki iing”.

Kumjuh da kaba pynpaw ia ka jingsngew skhem ban kynjoh ia kane ka thong kaba heh kumba la angnud, u Conrad ula ong “Ngi kyrmen skhem, kane ka dei ka aiom trei, bad ngin lah ban pyndep ia 1.40 lak ka thong ba ngi la buh bad lada kane ka urlong shisha, kan dei ka jingjop kaba khraw eh ia ka Tnat bad ka Sorkar baroh kawei bad ki nongioh jingmyntoi ruh ia ka skhim kin sa ioh noh ia kine ki Iing”.

Na ka liang u CM u pyntip ruh ba ka sorkar ka la thung ia u mission director uban khmih na ka bynta ban pynkloi ha ka ban pyntreikam ia kane ka projek, kata lyngba ki arngut ki assistant mission director ki ban iarap lem halor kane ka bynta.