Buh thong ka sorkar ban rep ‘Organic’ 1 lak hectare ka jaka

Syllad | The Rising MeghalayaFebruary 16, 2024

Ka sorkar jylla ka buh thong ban rep ‘Organic’ ne khlem khleh dawai haduh 1 lak hectare ka jaka bad ban pynlong ïa ka jylla Meghalaya kum kawei napdeng ki jylla ba hakhmat duh ha ka ri ban pynmih jingthung ba lait na ka jingpyndonkam dawai.

Ha ka jingkren ha ka Meghalaya Next Event kaba la pynlong ha Convocation Hall, NEHU haka 15 atrik Rymphang, u Commissioner & Secretary u Dr Vijay Kumar D u la ong, “Mynta ka sngi ngi la pyllait iaka State Organic Mission. Ka jylla Meghalaya ka don lai lak hectare ka jaka kaba hap hapoh ka jingrep jingriang bad na kane ngi kwah ba shi lak hectare ka dei ka jaka rep kaba lait na ka jingpyndonkam dawai. Kane ka jingthmu ka dei ruh kaba la ai jingkyrshan sa kawei pat napdeng ki mat pyntreikam jong ka KFW, kaba la mang na ka bynta ki nongrep.”

U la ong ruh ba ka sorkar jylla ka kwah ban wanrah kane ka jaka 1 lak hectare hapoh ka certified organic cultivation ne ka rukom rep kaba bud ryntih iaki kyndon khlem khleh ia kino kino ki sboh dawa bad pynlong iaka jylla ka nongialam ha ka rep riang khlem pyndonkam dawai

U Kumar u la ong “Lyngba kane mission yn ai jingkyrshan na ka bynta ki nongrep, ki kynhun jong ki nongrep, ki cooperative napdeng kiwei de ban pynurlong kane ka thong. Bad yn sa pyllait ruh ki jingthoh bad yn theh ruh iaka jinglad jingiarap pisa kaba bun ha kane ka mission.”

U la ong ruh ba ki mat pyntreikam kum ka FOCUS, PES, Mission Organic, ka jingïada ïa ki tyllong um ki dei kiba hap hapoh ka thup  jong ka Meghalaya Next.