Buh thong ka Sorkar Pdeng ban shna haduh 1250 km ka surok na ka PMGSY ha Meghalaya

Syllad | The Rising MeghalayaAugust 29, 2024

U Symbud Myntri Rangbah ka Jylla uba khmih ia ka Tnad PWD (Roads) u Bah Prestone Tynsong haka 28 tarik Nailar, u la ong ba ka Sorkar Pdeng ka la buh ia ka thong na ka bynta ka Meghalaya ban shna haduh palat 1250 km ka surok hapoh ka skhim Pradhan Mantri Gram Sadak Yojana (PMGSY) Phase-III.

Haba jubab ia ka jingkylli hapoh ka iingdorbar thaw ain, u Bah Tynsong u la ong ba ha ka kylla ne phase-I kaba nyngkong jong ka PMGSY-III, ka Ministry of Rural Development ka la mang ia ka pisa na ka bynta ban shna ia kumba 400 km ka surok.

Hynrei, watla katta na ka liang ka sorkar ka dang ap ban pyllait ia ka song pisa na ka bynta ban pyntreikam ia ka phase-II jong ki project shna surok ia kaba ka detailed project report (DPR) ba 600 km ka surok la dep ban aiti.

“Nga sngew skhem ba ngin ioh ia ka mang pisa na ka bynta kane ha ka por kaba biang,” u la ong.

Nalor kata u bah Prestone u pyntip ruh ba ka Ministry ka la dep lypa ban pynjynsur ia ki kyndon ban treikam ia ka PMGSY-III ha Meghalaya hadien ka jingkyrpad da ka sorkar Jylla ha ka jingleit iakynduh jong ka kynhun kaba u la ialam na ka jylla ha ryngkat u Myntri Rangbah u Conrad K Sangma.

Kumba ka long, ki project kiba don ha ka list kaba hakhmat eh mynta ki kynthup ia ka PMGSY-III, bad na ka liang ka Sorkar Pdeng ka la buh ia ka thong ba ka Jylla ka dei ban pyndep halor ka jingshna ia ki surok ba 1250 km hapoh jong une u snem mangtyngka 2024-2025.

Kham hashwa u Bah Prestone u la pyntip ba ka surok ba la tyrwa na Photjaud – Tynnai sha Mawbidong ha Mawkyrwat block la tyrwa ban pyntreikam noh hapoh jong ka PMGSY-III.

Na ka liang u MLA ka Mawkyrwat u Bah Renikton Lyngdoh Tongkhar u la pynpaw hapoh ka iingdorbar ba ki paidbah nongshong shnong jong ka thain ki la byrngem ban pynlong da ka jingiakhih ban ym ai shuh ia ka jingiatreilang bad ka sorkar lada jia ba kane ka surok kam ioh ia ka jingmang pisa.

U la ong ruh ba lada jia ba kane ka surok kam ioh ia ka jingmynjur na ka Ministry, la kyntu ia ka sorkar Jylla ba ka dei ban shim ia ki sienjam na ka bynta ban mang pisa noh lyngba ka state plan.

Halor kane, u Bah Prestone u la ong ba ka jingkylli kaba iadei bad ka jingbym ioh ia ka mang pisa kan ym mih satia namar la dep ban pynrung ha ka list kaba kham kongsan bad mynta ka dang ap satang ban ioh ia ka jingmang pisa na ka Ministry.