Buh thong ka Sorkar wow pynmiat pynioosuk wei pynlait ya ka sor Shillong nei khynnia khynrah

Syllad | The Rising MeghalayaFebruary 8, 2024

U Conrad K. Sangma haka 7tarik Thohlakhmi da ong u wa ka Sor Shillong toh ka nongbah nadooh I por ka Sorkar Assam tangwa hadooh katni ym em u ioo u Chynna yei tae I roi I par iwa yahap dur kat kam I yah ka juk ka por.

Ki bru wa chong chnong nangboon kat nangmih ki sngi wei ini man I daw bah wow hap ka Sorkar u mad u tynjooh, kamtae hajrong ini I daw bah daw san ka Sorkar hei yahkhmat iong-o da yaleh ko u thuh ki lad ki luti wei wow wanrah ki skim wapher khnang iow ye u pynmiat pynioosuk wei pynkylla dur ya ka kat kam I yah ka juk ka por.

U Conrad K. Sangma da klam u yeini hei por wa booh moo nongrim ya ka Wah Umkhrah River Front Development Project ha Polo hei emlang u Sniawbhalang Dhar, Deputy Chief Minister i/c Urban Affairs deilang u A.L.Hek, Minister Animal Husbandry and Veterinary.

Ong u I wanrah ya kani ka Project wa 39 Crore toh wow pynkylladur yei man ka Wah Umkhrah kamtae da khut u yei yakrehlang ki paidbah wa ki bor pynlai chnong wei chooh chooh leh hajrong kani ka thong daw yakrehlang leh wa ka Ministry of Jal Shakti, Govt. of India neibynta wow pynkhooid ya ka Wah Umkhrah wa ka Umshyrpi.

Heiyatoh wan wei khynniah khynrah ka sor Shillong, da khana u wa ka Sorkar da dep chongpyrkhat ko wow leh yei wa emkam ha ki waboon ki thaw kam ha Polo hajan ka Hotel Polo Tower wa ka Majestic Hotel wa ha kiwi kiwi ki bynta dei wow chna ya ki Parking.

Chooh chooh ha kani ka sngi u Chief Minister deilang u Deputy Chief Minister da e kiti ki leh ya ka song poisa wa 75,000 tyngka wa 1,50,000 tyngka cha ki kattu katni ki Dorbar Chnong  wa da mang hapoh ka Undeer My City Campaign.