Buh thong ka tnad Excise ban pyntreikam ia u QR code ban iohlum khajna ba T. 500 klur: Kyrmen

Syllad | The Rising MeghalayaOctober 2, 2024

Ka Tnad Excise ka Jylla ka la buh ia ka thong na ka bynta ka jingpynmih khajna kaba palat T.500 klur ha une u snem mang tyngka bad pynkhreh ruh ban pyntreikam noh shen ia u QR code ban tehlakam ia ka jinglait ei jong ki khana da 5 haduh 10 percent.

Haba kren sha ki lad pathai khubor ha ka 1 tarik Risaw, u Myntri ka Tnad Excise u Bah Kyrmen Shylla u la ong ba ka jingpynmih khajna ka la nangkiew man la u snem, bad mynta u snem ka thong ka long ban pynmih khajna kaba haduh palat T.500 klur bad kane kan dei ka synniang jong ngi sha ka Sorkar.

Nalor kata une u Myntri u la ong ruh ba ka tnad jong u ka la pynkhreh shaid shaid ha kaba iadei bad ka jingthmu ban pyntreikam noh ia u QR code khnang ban lah ban buddien ia ka jingiaid lynti jong ki mar bapher bapher bad khnang ban tehlakam ia ka jinglait ei ka khajna bad ban kyntiew ia ka jingioh lum khajna. U la ong ruh ba ka jingpyndep ia kane ka kam ka lah ban shim por kumba ar haduh lai bnai.

U Myntri ula pyntip ruh ba ka Tnad kam pat shym la pynkiew dor satia ia ki mar bad ha ka jingshisha, ka dor jong ki mar mynta ka dang duna haba ia nujor bad ka dor bala buh da ka Assam.

“Kumjuh haba phai sha ki hologram, ka por ka la kut ia ki. Ban pyntreikam ia u QR code ka don da ka sienjam kaba donkam ban hap leh. Kumta halor kane ngi la ai por biang ia ki company ba ngim lah ban pyllait ia ki mar sha ki iew ki hat khlem da lah ban buddien. Kumta ka long mynta ka jingbuddien ia ki mar ka dei ka hologram. Ngi la pynjlan ia ka por na ka bynta ka kompeni kaba pynmih ia ki hologram, hynrei ka dei tang kat haduh ban da pyntreikam ia u QR code,”  u la ong.

Shuh shuh u la ong ba kan ym don kano kano ka jingpynkylla ia ki mar. “Kane ka long namar ba kawei u QR code kan long na ka bynta u bilor. Lada don kano kano ka jingpynkylla, ka jingkitkhlieh kan shong ha ka kompeni.