Buh thong ka tnad PHE ban pyndep noh ka jingpyntrei ia ka JJM hapoh u Lber 2025

Syllad | The Rising MeghalayaDecember 11, 2024

U Myntri ka Tnad Public Health Engineering (PHE) u Marcuise N Marak ha ka 10 tarik Nohprah u la pyntip ba ka tnad ka la buh ia ka thong ban pyndep noh ha kaba iadei bad ka jingpyntreikam ia ka Jal Jeevan Mission (JJM) hapoh u bnai Lber 2025.

Haba kren sha ki lad pathai khubor, u Marcuise u la ong ba haduh 81.39 percent ka jingpyntrei ia ka kam la lah ban pyndep kat haduh mynta.

“Ka aiom trei ka dang shu sdang mynta bad baroh ki kontraktor bad kompeni ki la sdang pyniaid shakhmat ia ka kam bad ngi npyrshang katba lah ban pyndep ia kane ka jingpyntreikam hapoh u bnai Lber jong u snem u ban wan,” u la bynrap.

U la ong ruh ba ki don palat 6000 ki project kiba hap hapoh ka JJM bad baroh ki dei kiba la buh dak ne geo tag katkum ki jaka. “Baroh ki project ki la ioh ia ki jingbuh dak lem kumta ngin ym ioh satia ia ka song pisa na ka Sorkar India,” ong u Marak.

Watla katta u Myntri u pyntip ba ki don katto katne ki project ki bym shym la lah ban pyndep namar ki jingeh ba iatyngkhuh, kata kynthup ha kaba iadei bad ka jingslem ban ioh ia ka jingbit na ka tnad Forest.

Nalor kata u la ong ruh ba ka jingring tyrkhong jong ki tyllong um ruh ki long kawei na ki daw kaba la kwah bha ia ka jingpyntreikam ia ka project JJM.

Haba kylli, u Myntri u la ong, “Ki jingtyrwa ki long ba ka tnad ka la dep ban tyrwa ha kum kine ki jaka ki bym don dieng, bad ngi dang pynthikna ba ym dei satia ban po, ia ki dieng tang na ka bynta ban pyndep ia kane ka project. Hynrei namar ba ki dang hap hapoh ka Tnad Forest kumta ruh ka donkam ban ioh ia ka jingbit..”

“Ngi dang pyrshang ban ioh katto katne ka song pisa na ka Jylla. Nga la iakren bad u Myntri Rangbah ka Jylla u Conrad K Sangma, bad lada ka Sorkar Pdeng kam ai ia ka song jingiarap, ngin hap ban wad katto katne ka song pisa na ka sorkar Jylla khnang ba ngin lah ban pynkylla ia ki tyllong khnang ba kum kine ki project kin lah ban neh,” u la ong.